
धनकुटा । प्रतिनिधिसभा सदस्य निर्वाचनको सुरक्षामा खटिएका ९ सय ८९ जना म्यादी प्रहरीलाई आयआर्जन र उद्यम विकाससँग जोड्न धनकुटामा सीपमूलक तालिम दिने तयारी गरिएको छ ।
म्यादी प्रहरीको कार्यअवधि सकिएपछि उनीहरूलाई खाली हात घर फर्काउनुभन्दा जीविकोपार्जनमा सहयोग पुग्ने व्यावसायिक सीप सिकाएर पठाउने उद्देश्यले जिल्ला प्रशासन कार्यालयले यस्तो पहल गरेको हो । यसका लागि प्राविधिक शिक्षा तथा व्यावसायिक तालिम परिषद् (सीटीईभीटी) र घरेलु तथा साना उद्योग कार्यालयसँग समन्वय गरिएको छ ।
प्रमुख जिल्ला अधिकारी विनोदकुमार खड्काका अनुसार म्यादी प्रहरीलाई उनीहरूको रुचि अनुसार होटल व्यवस्थापन, प्लम्बिङ, इलेक्ट्रिसियन, फर्निचर, सिलाइ–कटाइ, मोबाइल तथा मोटरसाइकल मर्मत र घर पेन्टिङ जस्ता तालिम दिइनेछ ।
तालिमपश्चात् बैंक तथा वित्तीय संस्थासँग सहकार्य गरी इच्छुक व्यक्तिहरूलाई सहुलियतपूर्ण घरेलु उद्यम कर्जा उपलब्ध गराउने योजना समेत बनाइएको छ । सानो लगानीमा घरमै बसेर आम्दानी गर्न सकिने कुखुरा पालन, बाख्रा पालन र व्यावसायिक तरकारी खेतीतर्फ पनि उनीहरूलाई आकर्षित गरिने प्रजिअ खड्काले बताए ।
जिल्ला प्रहरी कार्यालय धनकुटाका प्रहरी उपरीक्षक शरतकुमार थापा क्षेत्रीले गाउँमै बसेर सानो उद्योग वा व्यवसाय गर्न चाहनेहरूका लागि यो कार्यक्रमले दीर्घकालीन सहयोग पुग्ने विश्वास व्यक्त गरे । तालिममार्फत कम्तीमा पाँच सय जना मात्रै उद्यममा लागे भने पनि धेरै परिवारको आर्थिक अवस्था सुधार हुने प्रशासनको अपेक्षा छ ।

























