महेन्द्र मोरङ क्याम्पसमा विद्यार्थीको भविष्यमाथि प्रशासनिक खेलबाड

विराटनगर । विराटनगरस्थित महेन्द्र मोरङ आदर्श बहुमुखी क्याम्पसमा विद्यार्थीको भविष्यसँग सम्बन्धित गम्भीर प्रशासनिक अनियमितता सार्वजनिक भएको छ ।

विद्यार्थीको भविष्यसँग प्रशासनिक खेलबाड भइरहेको पाइएको हो । क्याम्पसमा चारित्रिक प्रमाणपत्र जारी गर्ने प्रक्रियामा नियम उल्लंघन र कर्मचारीको गैरजिम्मेवारीले विद्यार्थीलाई प्रत्यक्ष जोखिममा पारेको छ ।

Advertisement

विद्यार्थीले परीक्षा नियन्त्रण कार्यालयबाट जारी भएको आफ्नो ट्रान्सक्रिप्ट लिएर क्याम्पसबाट क्लियरेन्स गर्नुपर्ने, आवश्यक शुल्क तिरेर निवेदन दिनुपर्ने र अन्ततः क्याम्पस प्रमुखको हस्ताक्षरबाट चारित्रिक प्रमाणपत्र प्राप्त गर्ने प्रक्रिया छ । नियमानुसार प्रत्येक कागजात तयार पार्ने, प्रमाणीकरण तथा हस्ताक्षर गर्ने कार्य निश्चित जिम्मेवारी अनुसार फरकफरक कर्मचारीले गर्नुपर्ने व्यवस्था छ ।

तर, व्यवहारमा यो प्रक्रिया मनपरी र अव्यवस्थित ढंगले सञ्चालन भइरहेको पाइएको छ । विशेषगरी, शैक्षिक प्रशासन शाखा प्रमुखको जिम्मेवारीमा कार्यरत विनोद कामतलाई विद्यार्थीको भविष्यमाथि खेलबाड गरिरहेको आरोप लागेको हो । मुख्य कार्यालय सहायक पदमा रहेर उनले आफूलाई अधिकृत देखाउँदै चारित्रिक प्रमाणपत्रमा शाखा अधिकृतको किर्ते हस्ताक्षर गरेको र आफ्नो अधिकार नाघेर काम गरेको खुलासा भएको छ ।

यसले प्रशासनिक उत्तरदायित्वमाथि प्रश्न उठाएको छ । संस्थागत पारदर्शिता र विश्वविद्यालयको साखमाथि पनि गम्भीर असर पुर्‍याएको छ । अधिकारकर्मी तथा सूचनाको हकका अभियन्ता योगराज दाहालले यो विषयको प्रमाण आफ्नो फेसबुकमार्फत सार्वजनिक गरेका छन् ।

दाहालले मुख्य कार्यालय सहायकले क्यारेक्टर सर्टिफिकेटमा हस्ताक्षर गरेको विषयलाई उजागर गर्दै क्याम्पसमा चरम लापरबाही र गैरजिम्मेवार कार्य भएको बताए । उनले फेसबुकमार्फत प्रमाणित कागजात, हस्ताक्षर नमुना, चारित्रिक प्रमाणपत्रको प्रतिलिपि र आधिकारिक पत्राचार समेत सार्वजनिक गरेका छन् ।

स्रोतका अनुसार यस प्रकरणमा क्याम्पस प्रमुख डा. रामावतार शरणको संलग्नता हुनसक्ने आशंका गरिएको छ । डा. शरणले भने अनआवश्यक आरोप लगाइएको बताए । ‘मैले पूरै कागजात नहेरिकन केही भन्न सक्दिन । तर, त्यस्तो काम नहुनुपर्ने हो,’ उनी भन्छन् ।

क्याम्पसका नायव शुब्बा कामतले भने छाप लगाउनेले गल्ती गरिदिएको बताए । ‘चारित्रिक प्रमाणपत्र आइसकेपछि त्यसलाई मैले प्रमाणीकरण गरिदिने हो । अनि त्यो क्याम्पस प्रमुखकोमा पुग्छ । छाप लगाउनेले मेरो हस्ताक्षर भएको ठाउँमा शाखा अधिकृत (सेक्सन अफिसर) भन्ने छाप लगाएर गल्ती गरिदिएछन् । मैले थाहा पाएपछि त्यसलाई रोकिसकेको छु,’ उनले भने ।

सूचनाको हकका अभियन्ता दाहाल भने यस्ता अनियमितताले विद्यार्थीको भविष्यलाई अन्योलमा पार्ने मात्र नभई विश्वविद्यालयको विश्वास र नैतिक आधारलाई कमजोर बनाउने बताउँछन् । सरोकारवालाहरू र सम्बन्धित निकायले यथाशीघ्र निष्पक्ष छानबिन गरी दोषीमाथि कडा कारबाही गर्नुपर्ने उनको माग छ ।

महेन्द्र मोरङ क्याम्पसमा भएको घटनाले शिक्षा क्षेत्रमा नक्कली ओहोदा, किर्ते हस्ताक्षर र प्रक्रियागत अव्यवस्थालाई प्रष्ट पार्ने दाहालको भनाइ छ । यसले विश्वविद्यालयको प्रतिष्ठा, विद्यार्थीको अधिकार र भविष्यमा गम्भीर धक्का पुर्‍याएको उनी बताउँछन् । उनका अनुसार सेक्सन अफिसरको अंग्रेजी छाप दर्ता शाखामा नभएर शैक्षिक प्रशासन शाखामा रहने हुँदा कामतले जानाजान गल्ती गरेका हुन् ।