
काठमाडौं । जल तथा मौसम पूर्वानुमान महाशाखाले आज (बिहीबार) देशका विभिन्न भू–भागमा वर्षा र हिमपातको सम्भावना रहेको जनाएको छ । हाल नेपालमा पश्चिमी न्यूनचापीय प्रणालीसँगै स्थानीय वायुको आंशिक प्रभाव रहेकाले मौसममा बदली देखिएको छ ।
महाशाखाका अनुसार बिहीबार दिउँसो कर्णाली र सुदूरपश्चिम प्रदेशका पहाडी तथा हिमाली क्षेत्रका धेरै स्थानमा मेघगर्जन, चट्याङ र असिनासहित मध्यम वर्षा हुने सम्भावना छ । साथै लुम्बिनी र गण्डकी प्रदेशका केही स्थानमा पनि यस्तै प्रकारको मौसम रहने प्रक्षेपण गरिएको छ ।
कोशी र बागमती प्रदेशका पहाडी भू–भाग तथा सुदूरपश्चिमको तराईका एक–दुई स्थानमा हल्कादेखि मध्यम वर्षा हुन सक्ने जनाइएको छ । उच्च पहाडी तथा हिमाली क्षेत्रमा भने हिमपातको सम्भावना रहेको छ ।
रातिको समयमा पनि लुम्बिनी, कर्णाली, सुदूरपश्चिम, गण्डकी, बागमती र कोशी प्रदेशका पहाडी तथा हिमाली भू–भागमा बदली रही केही स्थानमा वर्षासँगै असिना पर्ने सम्भावना रहेको महाशाखाले जनाएको छ ।
























