कोशीमा एसईईको तयारी अन्तिम चरणमा, ८० हजार बढी परीक्षार्थी

विराटनगर । आगामी चैत १९ गतेबाट सुरु हुने माध्यमिक शिक्षा परीक्षा (एसईई)को सम्पूर्ण तयारी कोशी प्रदेशमा अन्तिम चरणमा पुगेको छ ।

परीक्षा व्यवस्थित, मर्यादित र सुरक्षित रूपमा सञ्चालन गर्न प्रदेशभर व्यापक तयारी गरिएको शिक्षा विकास निर्देशनालय धनकुटाका निर्देशक कृष्णप्रसाद पोखरेलले जानकारी दिए । उनका अनुसार परीक्षा केन्द्र व्यवस्थापनदेखि सुरक्षा, अनुगमन तथा विद्यार्थी सहजीकरणसम्मका सबै विषयमा स्पष्ट निर्देशन जारी गरिएको छ ।

आवश्यकता अनुसार परीक्षा केन्द्र रहेका विद्यालयमा नर्सको व्यवस्था गरिनेछ भने नर्स उपलब्ध नभए नजिकका स्वास्थ्य संस्थासँग समन्वय गरेर सेवा सुनिश्चित गरिने व्यवस्था मिलाइएको छ । पोखरेलका अनुसार परीक्षा केन्द्रमा केन्द्राध्यक्ष, सहायक केन्द्राध्यक्ष, निरीक्षक तथा अन्य कर्मचारीहरूको छनोट र परिचयपत्र व्यवस्थापनको काम सम्पन्न भइसकेको छ ।

विद्यार्थीलाई सहज बनाउनलाई परीक्षा केन्द्र नजिकै बसोबासको व्यवस्था मिलाउन स्थानीय तहलाई अनुरोध गरिएको छ । परीक्षा दिन विद्यार्थी अनिवार्य रूपमा विद्यालय पोसाकमा उपस्थित हुनुपर्नेछ भने खुला समूहका परीक्षार्थीले फोटोसहितको परिचयपत्र अनिवार्य ल्याउनुपर्ने व्यवस्था गरिएको छ ।

परीक्षा केन्द्रहरूको नियमित अनुगमन स्थानीय तहका प्रमुख प्रशासकीय अधिकृत तथा सम्बन्धित निकायको नेतृत्वमा गरिनेछ । मोबाइल फोन, स्मार्ट वाच लगायतका इलेक्ट्रोनिक उपकरणको प्रयोगमा पूर्ण प्रतिबन्ध लगाइएको छ । सीसीटीभी जडान भएका विद्यालयलाई परीक्षा केन्द्रका रूपमा प्राथमिकता दिइने र त्यसमार्फत पनि अनुगमन गरिनेछ ।

उत्तरपुस्तिका सुरक्षा र ढुवानीका लागि आवश्यक सुरक्षाकर्मी परिचालन गरिनेछ । परीक्षा सुरु हुनुअघि सम्बन्धित कर्मचारी तथा सुरक्षाकर्मीलाई अभिमुखीकरण गरिनेछ । साथै, परीक्षा केन्द्रमा प्राथमिक उपचार सामग्री, शौचालय व्यवस्थापन तथा आवश्यक स्थानमा मनोसामाजिक र पारिवारिक परामर्श सेवा उपलब्ध गराइनेछ ।

यसवर्ष कोशी प्रदेशभर ३३२ परीक्षा केन्द्र र ८० हजारभन्दा बढी परीक्षार्थी छन् । ८० हजार ९ सय १० जना परीक्षार्थी एसईईमा सहभागी हुने कार्यालयले जनाएको छ ।

कार्यालयका अनुसार परीक्षा सञ्चालनका लागि ३ हजार ३२ केन्द्राध्यक्ष, ५४६ सहायक केन्द्राध्यक्ष, ४ हजार ६३ निरीक्षक, ८ सय १३ सहायक कर्मचारी, १ हजार ६ सय १५ सहयोगी कर्मचारी र ४ हजार ९ सय ८० सुरक्षाकर्मी परिचालन गरिने छ । कार्यालयले परीक्षालाई शान्त, व्यवस्थित र निष्पक्ष बनाउन सबै सरोकारवाला निकायसँग समन्वय एवं सहयोगको आह्वान गरेको छ ।