सिकाइलाई व्यवहारिक बनाउँदै, विद्यार्थीले गरे अर्ग्यानिक केमेस्ट्रीको ‘पोस्टर प्रिजेन्टेसन’

विराटनगर । विराटनगरस्थित ग्रिनल्याण्ड कलेजका विद्यार्थीहरूले एक विशेष ‘पोस्टर प्रिजेन्टेसन’ कार्यक्रम सम्पन्न गरेका छन् । कक्षा १२ को विज्ञान संकायमा अध्ययनरत रसायन शास्त्रका विद्यार्थीहरूले अर्ग्यानिक केमिकल रियाक्सन सम्बन्धी आफ्नो प्रस्तुति दिएका हुन् ।

विद्यार्थीहरूले समूहगत रूपमा एउटा अर्ग्यानिक केमिकललाई अर्को अर्ग्यानिक केमिकलमा कसरी रूपान्तरण गर्ने भन्ने विषयमा रोचक र जानकारीमूलक पोस्टरहरू प्रस्तुत गरेका थिए । कलेजले पहिलो पटक आयोजना गरेको यस किसिमको रचनात्मक कार्यक्रम निकै प्रभावकारी देखिएको कलेज प्रशासनले जनाएको छ ।

Advertisement

कार्यक्रमका बारेमा जानकारी दिँदै कलेजका निर्देशक पवन साहले अर्ग्यानिक केमेस्ट्रीको महत्वमाथि प्रकाश पारे । उनका अनुसार कक्षा १२ को बोर्ड परीक्षामा रसायन शास्त्रअन्तर्गत अर्ग्यानिक रियाक्सनबाट मात्रै करिब ६० प्रतिशत प्रश्नहरू सोधिने गरिन्छ ।

निर्देशक साहले भने, ‘विद्यार्थीहरूले एउटा औषधिबाट अर्को औषधि कसरी बनाउने, विषादीहरूको रूपान्तरण कसरी गर्ने र दैनिक जीवनमा प्रयोग हुने आधुनिक प्रविधिमा रसायनको भूमिका कस्तो हुन्छ भन्ने कुरा व्यवहारिक रूपमा सिकेका छन् । यसले उनीहरूको आगामी बोर्ड परीक्षामा समेत ठुलो सहयोग पुग्ने छ ।’

त्यसैगरी, कलेजका प्रिन्सिपल दिनेश दाहालले विद्यार्थीको प्रस्तुतिले किताबी ज्ञानलाई व्यवहारिक सिकाइसँग जोड्न मद्दत पुगेको बताए । उनका अनुसार कार्यक्रममा कुल ११ वटा समूहले सहभागिता जनाएका थिए ।
प्रिन्सिपल दाहालले भने, ‘यस्ता कार्यक्रमले सिकाइलाई प्रभावकारी र दीर्घकालीन बनाउँछ । विद्यार्थीहरूको उत्साहजनक सहभागिताले हामीलाई थप हौसला मिलेको छ ।’

प्रस्तुतिका आधारमा उत्कृष्ट हुने विद्यार्थीहरूको समूहलाई कलेजका तर्फबाट पुरस्कार समेत वितरण गरिएको थियो । सैद्धान्तिक ज्ञानलाई प्रयोगात्मक र रचनात्मक ढंगले प्रस्तुत गर्न पाउँदा विद्यार्थीहरू समेत निकै उत्साहित देखिएका थिए ।