कोशी प्रदेश स्तरीय राष्ट्रपति रनिङ शिल्डको तयारी पूरा   

इटहरी ।  कोशी प्रदेश स्तरीय १६ औँ राष्ट्रपति रनिङ शिल्ड खेलकुद प्रतियोगिताको तयारी पूरा भएको छ ।
कोशी प्रदेश खेलकुद विकास बोर्डले शनिबार इटहरीमा पत्रकार सम्मेलनको आयोजना गर्दै प्रतियोगिताको सम्पूर्ण तयारी पूरा भएको जानकारी दिएको हो ।

पत्रकार सम्मेलनमा बोल्दै बोर्डका सदस्यसचिव विप्लव घोषले जेठ १७ र १८ गते इटहरीमा हुन लागेको प्रदेश स्तरीय राष्ट्रपति रनिङ शिल्डको सबै तयारी पूरा भएको बताए । उनले तयारीका लागि छोटो समय प्राप्त भए पनि प्रतियोगिता सम्पन्न गर्न बोर्डले सम्पूर्ण पहल गर्ने प्रस्ट्याए ।

Advertisement

प्रदेशको १४ जिल्लाका १ हजार ७ सय बढी खेलाडी, प्रशिक्षकहरू सहभागिता रहने छ । प्रतियोगितामा एथलेटिक्स, कबड्डी, भलिबल, कराँते, तेक्वान्दो, उसु लगायतको खेलमा प्रतिस्पर्धा हुनेछ ।  प्रतियोगिता आयोजना गर्न करिब २ करोड १० लाख रुपैयाँ खर्च हुने अनुमान गरिएको बताइएको छ । प्रतियोगितामा उत्कृष्ट खेल प्रदर्शन गर्ने खेलाडीले काठमाडौंमा हुने राष्ट्रिय स्तरको राष्ट्रपति रनिङ शिल्डमा खेल्ने छन् ।

प्रदेश स्तरीय प्रतियोगिता सकिए काठमाडौंका लागि छनौट भएका खेलाडीलाई बन्द प्रशिक्षणमा राख्नु पर्ने हुन्छ । तर, उनीहरूलाई बन्द प्रशिक्षणमा राख्ने समय पर्याप्त नहुँदा प्रदेशको लगानी र अपेक्षा अनुसार पदक ल्याउन कठिन हुने खेल विज्ञहरू बताउँछन् ।