
काठमाडौं । पश्चिमी वायु र स्थानीय वायुको आंशिक प्रभावका कारण देशका विभिन्न क्षेत्रमा मौसममा परिवर्तन देखिएको छ ।
मौसम पूर्वानुमान महाशाखाका अनुसार हाल कोशी, बागमती र गण्डकी प्रदेशका पहाडी तथा हिमाली भू–भागमा सामान्यदेखि आंशिक बदली रहेको छ भने अन्य क्षेत्रको मौसम सामान्यतया सफा छ । शनिबार दिनभर देशका हिमाली क्षेत्रमा बदली रहने र केही स्थानमा हल्का वर्षा तथा हिमपातको सम्भावना रहेको छ ।
विशेषगरी गण्डकी प्रदेश, कर्णाली प्रदेश र सुदूरपश्चिम प्रदेशका हिमाली भेगमा हल्का वर्षा र हिमपात हुन सक्ने जनाइएको छ । साथै, केही पहाडी क्षेत्रमा मेघगर्जन र चट्याङसहित हल्का वर्षा हुने सम्भावना पनि रहेको छ ।
त्यस्तै, लुम्बिनी र सुदूरपश्चिम प्रदेशका तराई क्षेत्रमा हावाहुरी चल्ने सम्भावना रहेकाले आवश्यक सतर्कता अपनाउन आग्रह गरिएको छ । मौसमविद्का अनुसार पहाडमा वर्षा र तराईमा हावाहुरीको मिश्रित प्रभावले दैनिक जनजीवनमा सामान्य असर पर्न सक्छ ।
























