मोरङमा ‘ड्रग फ्रि क्याम्पेन’

Share this
683shares
मुलुकी खबर
मुलुकी खबर
clock२०८३ बैशाख ४, शुक्रबार १७:२४

विराटनगर । भारतसँग खुला सीमा जोडिएको मोरङमा प्रहरीले ‘ड्राग फ्रि क्याम्पेन’ (लागुऔषध मुक्त मोरङ अभियान) चलाएको छ ।

भारतसँगको खुला सीमाका कारण मोरङमा लागुऔषध नियन्त्रण चुनौतीपूर्ण बन्दै गइरहेका बेला प्रहरी नयाँ अभियानसहित सक्रिय भएको हो । भारतबाट विभिन्न बाटो हुँदै भित्रिने लागुऔषधको दलदलमा नेपाली समाज फसिरहेका बेला मोरङ प्रहरीले भने ‘ड्राग फ्रि क्याम्पेन ईन मोरङ’ नाम दिएर विशेष अभियानलाई तीव्र पारेको छ ।

मोरङ प्रहरीका सूचना अधिकारी, डीएसपी लीलाराज लामिछाने लागुऔषध नियन्त्रणलाई केन्द्रमा राखेर अभियान चलाइएको बताउँछन् । पछिल्ला दिनहरूमा कडा निगरानी र नियमित चेकजाँचलाई तीव्र पारिएको उनको भनाइ छ ।

चेकजाँचकै क्रममा प्रहरीले दुई जनालाई विराटनगरबाट नियन्त्रणमा लिएको छ । पक्राउ परेकाको साथबाट ठूलो परिमाणमा लागुऔषध खैरो हेरोइन (ब्राउन सुगर) बरामद भएको छ । यस घटनालाई आधार बनाएर प्रहरीले लागुऔषध कारोबारसँग सम्बन्धित सञ्जालका बारेमा अनुसन्धानको दायरा विस्तार गरेको छ ।

लागुऔषध नियन्त्रण ब्युरो विराटनगर र वडा प्रहरी कार्यालय विराटनगरको संयुक्त टोलीले बिहीबार दिउँसो २ः३० बजेतिर विराटनगर महानगरपालिका–११ स्थित पारस अस्पतालको गेट अगाडि शंकास्पद अवस्थामा रहेका दुई जनालाई पक्राउ गरेको हो । पक्राउ पर्नेमध्ये एक जना भारतीय नागरिक छन् । दुवै व्यक्तिको गतिविधि शंकास्पद देखिएपछि तत्काल रोकेर खानतलासी गर्दा साथबाट लागुऔषध बरामद भएको डीएसपी लामिछानेले बताए ।

उनका अनुसार भारत बिहारका ४४ वर्षीय मोहमद सरिफ र मोरङको जहदाका ४० वर्षीया लालमन मुखियालाई पक्राउ गरिएको हो । प्लाष्टिकमा पोको पारेर ल्याउँदै गरेको लागुऔषध ब्राउन सुगर बरामद भएको लामिछाने बताउँछन् । उनीहरुको साथबाट प्लास्टिकसहित १०५ ग्राम १३ मिलिग्राम ब्राउन सुगर बरामद भएको छ ।

पक्राउ परेका दुवै जनाविरुद्ध लागुऔषध ऐनअन्तर्गतको मुद्दा चलाउन शुक्रबार अदालतबाट म्याद थप गरेर अनुसन्धानको बाँकी प्रक्रिया अघि बढाइएको प्रहरीले जनाएको छ । प्रहरीको प्रारम्भिक अनुसन्धानबाट दुवै जना लामो समयदेखि लागुऔषधको धन्दामा संलग्न रहेको पत्ता लागेको छ ।

सरिफले भारतबाट लागुऔषध ‘सप्लाई’ गर्ने र मुखियाले विराटनगरलगायत विभिन्न स्थानमा पुर्याउने गरेको पाइएको प्रहरीको भनाइ छ । डीएसपी लामिछानेका अनुसार लागुऔषध कहाँबाट ल्याइएको हो, कसलाई आपूर्ति गर्न लागिएको थियो र यसको पछाडि संगठित सञ्जाल छ वा छैन भन्ने विषयमा विस्तृत अनुसन्धान भइरहेको छ ।

मोरङ प्रहरी प्रमुख एसपी कवित कटवाल लागुऔषध नियन्त्रणलाई उच्च प्राथमिकतामा राखेर अभियानलाई व्यापक बनाइएको बताउँछन् । भारतसँग सीमा जोडिएका स्थानलाई संवेदनशील क्षेत्रका रूपमा लिँदै उच्च निगरानीमा राखेर चेकजाँच कडा पारिएको उनको भनाइ छ ।

सार्वजनिक स्थल, अस्पताल क्षेत्र, बसपार्क, सीमावर्ती नाकालगायत स्थानमा नियमित सुरक्षा अनुगमन बढाइएको छ । लागुऔषधको कारोबार एवं ओसारपसारमा संलग्नलाई कानुनी कारबाही हुने प्रहरीले जनाएको छ ।

एसपी कटवालले जनप्रतिनिधि, विभिन्न निकाय र समुदायसँग समन्वय गरेर अभियान तीव्र पारिएको बताए । उनले यस्ता अवैध गतिविधिका बारेमा सूचना दिएर सहयोग गर्न सबैमा आग्रह गरेका छन् । लागुऔषध नियन्त्रणलाई प्रभावकारी नबनाएमा समाज थप संकटमा पर्ने प्रहरीको बुझाइ छ ।

अभियान जिल्लाभर नै सञ्चालन गरिएको एसपी कटवालको भनाइ छ । ‘अभियानलाई पक्राउ वा कारबाहीमा सीमित नभई बहुआयामिक रूपमा अघि बढाइएको छ । प्रयोगकर्तालाई उपचार तथा पुनःस्थापनातर्फ मार्गदर्शन गर्ने, बिक्री तथा ओसारपसारमा संलग्नलाई कानुनी दायरामा ल्याउने र समुदायस्तरमा जनचेतना फैलाउने काम एकैसाथ भइरहेको छ,’ उनले भने ।

एसपी कटवालले लागुऔषधको बढ्दो समस्या नियन्त्रण गर्न प्रहरी मात्र नभई समुदाय, स्थानीय तह, विद्यालय र परिवार सबैको संयुक्त भूमिका आवश्यक रहेको बताएका छन् । उनका अनुसार अभियानअन्तर्गत कुकुरसहितको चेकजाँचलाई तीव्र पारिएको छ । सीमावर्ती क्षेत्रबाट हुने सम्भावित ओसारपसार रोक्न नियमित निगरानी र आकस्मिक चेकपोइन्टहरू समेत सक्रिय पारिएको उनको भनाइ छ ।

प्रहरीको कडाइसँगै पछिल्ला दिनहरूमा लागुऔषध कारोबारमा संलग्न समूहहरू दबाबमा परेका छन् । कारोबार एवं ओसारपसार हुने विराटनगर र आसपासका सम्भावित क्षेत्रमा प्रहरीले निरन्तर निगरानी गरिरहेको छ ।

‘लागुऔषधको संगठित गिरोहसँग सम्बन्धित सञ्जाल भत्काउन प्रहरी सक्रिय छ । नियन्त्रण चुनौतीपूर्ण भए पनि निरन्तर निगरानी, सूचना संकलन र समुदायको सहयोगले यसको नियन्त्रण सम्भव छ,’ एसपी कटवालले भने ।

मोरङमा सुरु गरिएको ‘लागुऔषध मुक्त मोरङ’ अभियानलाई प्रभावकारी ढंगले दीर्घकालीन रूपमा अघि बढाउने प्रहरीको योजना छ । सबै पक्षको सक्रियताले नै लागुऔषधको धन्दा नियन्त्रणमा सफलता प्राप्त हुने र संकटमा पर्नबाट समुदायलाई बचाउन सकिने कटवालले बताए ।

तपाइको प्रतिक्रिया
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
सुनसरीलाई सीसीटीभी निगरानीमा राख्ने योजना, २५० वटा जडान गरिँदै
दानबहादुर कार्कीको रिटमा बुधबार सर्वोच्चमा सुनुवाइ हुँदै
विराटनगरमा राति २ बजेसम्म व्यवसाय खोल्न पाइने, अनुमति प्रक्रिया सुरु
भारतीयका परिवार नै मिलेर नेपालमा लागुऔषध ‘सप्लाई’ : मोरङको रंगेलीबाट बुवा, आमा र छोरा पक्राउ
थाइल्यान्डमा एक भवनमा भीषण आगलागी, ११ जनाको मृत्यु
‘साउदीको अमेजनका गोदाममा नेपालीसहितका श्रमिक शोषणमा’
मोरङमा सेप्टिक ट्यांकीभित्र बालकको शव फेला
© 2024 Muluki Khabar. All Rights Reserved. Design & Develop By: Indesign Media Pvt. Ltd.