सगरमाथाबाट मात्रै ८९ करोडभन्दा बढी रोयल्टी संकलन

काठमाडौं । वसन्त ऋतुको पर्वतारोहण सिजनमा सगरमाथा आरोहणबाट मात्रै ८९ करोड रुपैयाँभन्दा बढी रोयल्टी संकलन भएको छ ।

पर्यटन विभागका अनुसार बिहीबारसम्म सगरमाथासहित ३० वटा हिमाल चढ्नका लागि ९४४ जना पर्वतारोहीले अनुमति पाएका छन् । सगरमाथा आरोहणका लागि ४१ समूहका ४१० जनाले अनुमति पाएको विभागले जनाएको छ ।

Advertisement

यसबाट मात्रै ८९ करोड ३ लाख रुपैयाँ रोयल्टी संकलन भएको हो । कोशी प्रदेशको सोलुखुम्बुमा रहेको विश्वकै सर्वोच्च शिखर सगरमाथा ९७ जना महिला पर्वतारोहीले आरोहण गरेको विभागले जनाएको छ ।

यसै सिजनमा लोत्से हिमालका लागि ७ समूहका ८६, आमादब्लमका लागि ८ समूहका ९२, मकालुका लागि ५४ र हिमलुङ हिमालका लागि ५ समूहका ४४ जनाले आरोहण अनुमति प्राप्त गरेका छन् । विदेशी पर्वतारोहीको सहभागिता पनि उल्लेखनीय रहेको छ ।

चीनबाट १२७, अमेरिकाबाट १००, बेलायतबाट ६४, रुसबाट ६० र अष्ट्रेलियाबाट २२ जनाले विभिन्न हिमाल आरोहणका लागि अनुमति लिएका छन् । यस वर्षको वसन्त सिजनमा हिमाल आरोहण गतिविधि बढेसँगै पर्यटन क्षेत्रबाट एक अर्ब रुपैयाँभन्दा बढी रोयल्टी संकलन भएको विभागले जनाएको छ ।