हर्कको असन्तुष्टि, उपसभामुखमाथि पनि प्रश्न

काठमाडौं । श्रम संस्कृति पार्टीका अध्यक्ष हर्क साम्पाङ (हर्कराज राई)ले संवैधानिक परिषद् सम्बन्धी अध्यादेशमार्फत गरिएको प्रधान न्यायाधीशको सिफारिसप्रति कडा असन्तुष्टि जनाएका छन् ।

उनले संसद् छलेर अध्यादेश ल्याइएको र न्यायपालिकाको वरीयता मिचिएको भन्दै गम्भीर प्रश्न उठाएका छन् । शुक्रबार विज्ञप्ति जारी गर्दै साम्पाङले चौथो वरीयताका न्यायाधीशलाई प्रधानन्यायाधीश सिफारिस गर्नु सरकारको ठूलो गल्ती भएको बताएका हुन् । सुशासन र विधिको शासनको नारा दिएर सत्तामा पुगेकाहरूले नै प्रक्रिया मिचेको उनको आरोप छ ।

Advertisement

उनले राष्ट्रप्रमुखलाई दबाब दिएर अध्यादेश जारी गराइएको दाबी गर्दै यस्तो कार्य गलतलाई सही ठहर गर्ने प्रयास भनेर टिप्पणी गरेका छन् । नियुक्तिपछि अदालतबाट आफूअनुकूल निर्णय गराउने राजनीतिक र कानुनी स्वार्थ लुकेको आशंका पनि उनले व्यक्त गरेका छन् ।

साम्पाङले सहकारी ठगी प्रकरण र भदौ २३–२४ को जेनजी आन्दोलनसम्बन्धी विषयलाई समेत जोड्दै सिफारिस प्रक्रियामाथि शंका व्यक्त गरेका छन् । बैठकका क्रममा एमसीसी र एसपीपीजस्ता विषय उठाएर प्रभाव सिर्जना गरिएको दाबी पनि उनको छ ।

यस्तै, साम्पाङले आफ्नै पार्टीबाट निर्वाचित उपसभामुख रबीकुमारी ठाकुरले वरीयता उल्लंघन गरेर गरिएको निर्णयमा हस्ताक्षर गरेको भन्दै उनले असन्तुष्टि जनाएका छन् । विधि र प्रक्रिया मिचेर गरिने निर्णयको श्रम संस्कृति पार्टीले सधैं विरोध गर्ने उनको भनाइ छ।