पूर्वगृहमन्त्री गुरुङलाई चोख्याउन छानबिन समिति गठन गरिएको कांग्रेसको आशंका

काठमाडौं । प्रमुख विपक्षी दल नेपाली कांग्रेसले पूर्वगृहमन्त्री सुधन गुरुङलाई छानबिन समितिमार्फत चोख्याउन लागिएको आशंका गरेको छ। कांग्रेस संसदीय दलका नेता भीष्मराज आङ्देम्बेले सरकारले गठन गरेको छानबिन समितिले सत्यतथ्य पत्ता लगाउनुको सट्टा गुरुङलाई सफाइ दिने प्रयास गर्न सक्ने बताए। ‘समितिले निष्पक्ष छानबिन गरोस्, चोख्याउने दाउ मात्र नगरोस्,’ नेता आङ्देम्बेले भने।

उनले पूर्वगृहमन्त्री गुरुङमाथि लागेको आरोपको निष्पक्ष छानबिन हुनुपर्ने धारणा राखे। सरकारले समिति गठन गर्नुलाई सकारात्मक कदम भन्दै उनले समितिको निष्पक्षतामै यसको विश्वसनीयता निर्भर रहने स्पष्ट पारे। समितिले कुनै पनि राजनीतिक प्रभावमा नपरी सत्यतथ्य बाहिर ल्याउनुपर्ने आङ्देम्बेको भनाइ छ।

Advertisement

पूर्वगृहमन्त्री गुरुङ विवादित व्यापारी दीपक भट्टसँगको सेयर लगानी तथा आर्थिक सम्बन्धका कारण विवादमा तानिएका थिए। सार्वजनिक रूपमा गम्भीर प्रश्न उठेपछि गुरुङले गत वैशाख ९ गते नैतिकताको आधार देखाउँदै गृहमन्त्री पदबाट राजीनामा दिएका थिए।

उनले राजीनामा दिएको तीन साता बितेपछि सरकारले छानबिन समिति गठन गरेको हो। सरकारले बिहीबार उच्च अदालतका पूर्वन्यायाधीश अच्युतप्रसाद भण्डारीको नेतृत्वमा तीन सदस्यीय छानबिन समिति गठन गरेको घोषणा गरेको छ।