देशका धेरै भू–भागमा वर्षाको सम्भावना

काठमाडौं । नेपालमा अहिले पश्चिमी वायु, स्थानीय वायु तथा पूर्वी भू–भाग नजिक सक्रिय न्यून चापीय क्षेत्रको प्रभाव कायमै रहेको मौसम पूर्वानुमान महाशाखाले जनाएको छ ।

महाशाखाका अनुसार देशका विभिन्न क्षेत्रमा वर्षा, मेघगर्जन, चट्याङ र तातो लहरको सम्भावना छ । आज (शनिबार) बिहानैबाट कोशी प्रदेशसहित देशका अधिकांश हिमाली तथा पहाडी भू–भागमा सामान्यदेखि आंशिक बदली रहेको छ ।

Advertisement

मधेश प्रदेशमा आंशिक बदली देखिएको छ भने बाँकी तराई क्षेत्रमा मौसम मुख्यतया सफा रहेको छ । यतिबेला गण्डकी प्रदेशका केही स्थान तथा सुदूरपश्चिम प्रदेशका एक–दुई स्थानमा मेघगर्जन र चट्याङसहित मध्यम वर्षा भइरहेको महाशाखाले जनाएको छ ।

शनिबार दिउँसो कोशी, बागमती र गण्डकी प्रदेशमा सामान्यदेखि पूर्ण बदली रहने सम्भावना रहेको छ । मधेश प्रदेशसहित अन्य प्रदेशका हिमाली तथा पहाडी क्षेत्रमा आंशिक बदली रहने अनुमान गरिएको छ भने अधिकांश तराई भू–भागमा मौसम मुख्यतया सफा रहनेछ ।

मौसमविद्का अनुसार कोशी, बागमती र गण्डकी प्रदेशका हिमाली तथा पहाडी भू–भागका केही स्थानमा मेघगर्जन, चट्याङसहित मध्यम वर्षा हुन सक्नेछ । त्यस्तै, कोशी, बागमती र गण्डकी प्रदेशका तराई क्षेत्रका थोरै स्थानमा पनि वर्षाको सम्भावना रहेको छ । लुम्बिनी र कर्णाली प्रदेशका हिमाली तथा पहाडी क्षेत्रका एक–दुई स्थानमा समेत वर्षा तथा हिमपात हुन सक्ने महाशाखाले जनाएको छ ।

विशेषगरी गण्डकी प्रदेशका पहाडी क्षेत्रका एक–दुई स्थानमा भारी वर्षाको सम्भावना रहेकाले सतर्कता अपनाउन आग्रह गरिएको छ । वर्षासँगै पहाडी क्षेत्रमा भू–क्षय, पहिरो तथा सडक अवरोधको जोखिम समेत बढ्न सक्ने मौसमविद्को भनाइ छ ।

यता सुदूरपश्चिम र लुम्बिनी प्रदेशका पहाडी क्षेत्रमा तातो दिनको प्रभाव कायम रहने तथा तराई भू–भागमा तातो लहर चल्न सक्ने सम्भावना रहेको जनाइएको छ । अत्यधिक गर्मीका कारण स्वास्थ्यमा असर पर्न सक्ने भएकाले आवश्यक सावधानी अपनाउन पनि आग्रह गरिएको छ ।

राति पनि कोशी, मधेश, बागमती र गण्डकी प्रदेशमा सामान्यदेखि पूर्ण बदली रहने अनुमान गरिएको छ । बाँकी प्रदेशका हिमाली तथा पहाडी क्षेत्रमा आंशिक बदली रहनेछ भने तराईका अधिकांश क्षेत्रमा मौसम सफा रहने पूर्वानुमान छ ।

रातिको समयमा कोशी र मधेश प्रदेशका केही स्थानमा तथा बागमती र गण्डकी प्रदेशका हिमाली तथा पहाडी भू–भागका थोरै स्थानमा मेघगर्जन, चट्याङसहित मध्यम वर्षा हुन सक्ने विभागले जनाएको छ । कर्णाली प्रदेशका हिमाली क्षेत्रका एक–दुई स्थानमा हिमपातको सम्भावना समेत रहेको छ ।

यसैगरी, कोशी प्रदेशका पहाडी तथा तराई क्षेत्रका केही स्थानमा रातिको समयमा भारी वर्षा हुन सक्ने भएकाले नदी तथा खोला आसपासका बासिन्दालाई सतर्क रहन आग्रह गरिएको छ ।