बस यात्रामा नयाँ सुरक्षा अभ्यास, अब लगेजमा ट्याग अनिवार्य

Share this
743shares
मुलुकी खबर
मुलुकी खबर
clock२०८३ जेठ ९, शनिबार ०७:४१

काठमाडौं । उपत्यकाबाट चल्ने लामो दूरीका सार्वजनिक बसमा यात्रुको झोला सुरक्षित राख्न नयाँ ‘लगेज ट्याग’ प्रणाली लागू हुने भएको छ ।

यात्रुको सामान हराउने, साटिने र चोरी हुने समस्या नियन्त्रण गर्न भन्दै काठमाडौं उपत्यका ट्राफिक प्रहरी कार्यालय र राष्ट्रिय यातायात व्यवसायी महासंघबीच सम्झौता भएको हो । जेठ १५ गतेदेखि लागू हुने यस व्यवस्थाअन्तर्गत यात्रुले बस काउन्टरमा आफ्नो लगेज दर्ता गर्दा विशेष नम्बर वा कोडसहितको ट्याग पाउनेछन् ।

सोही नम्बरको आधारमा गन्तव्यमा पुगेपछि मात्र सामान बुझाइनेछ । यात्रु र सामानको ट्याग मिलाएपछि मात्रै झोला हस्तान्तरण गरिने भएकाले गलत व्यक्तिले सामान लैजाने समस्या अन्त्य हुने अपेक्षा गरिएको छ ।

ट्राफिक प्रहरी प्रमुख नवराज अधिकारीका अनुसार लामो दूरीका यात्रामा बढ्दै गएको झोला हराउने र अवाञ्छित गतिविधि नियन्त्रण गर्न यो प्रणाली प्रभावकारी हुनेछ । यातायात व्यवसायी महासंघका अध्यक्ष सरोज सिटौलाले यसलाई बस सेवामा आधुनिक व्यवस्थापनतर्फको महत्वपूर्ण कदम बताएका छन् ।

सुरुवाती चरणमा लामो दूरीका बसमा लागू हुने यो प्रणालीलाई भविष्यमा डिजिटल र क्यूआर कोडसँग जोड्ने तयारी पनि गरिएको छ । यात्रु सुरक्षालाई प्राथमिकतामा राख्दै यो अभ्यासले सार्वजनिक यातायातप्रतिको विश्वास बढाउने अपेक्षा गरिएको छ ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.