आगलागी हुँदा एक घर जलेर नष्ट 

खाँदबारी । सङ्खुवासभाको धर्मदेवी नगरपालिका–१ पाँचखालको तामाङ टोलमा शुक्रबार राति भएको आगलागीबाट एक घर जलेर पूर्ण रूपमा नष्ट भएको छ। स्थानीय राजु तामाङको घरमा आगो लाग्दा करिब ४ लाख रुपैयाँ बराबरको धनमाल क्षति भएको प्रहरीले जनाएको छ ।

प्रहरीका अनुसार ढुंगा, माटो र काठले बनेको एक तले घर आगलागीबाट पूरै जलेर नष्ट भएको छ । आगलागीमा परी घरभित्र रहेका अन्नपात, लत्ताकपडा र महत्त्वपूर्ण कागजातहरू समेत जलेर नष्ट भएको प्रहरीले जनाएको छ ।

Advertisement

घटनाको जानकारी पाए लगत्तै प्रहरी चौकी मंगलबारेबाट खटिएको प्रहरी टोली र स्थानीय बासिन्दाको संयुक्त प्रयासमा आगो नियन्त्रणमा लिइएको थियो । समयमै आगो नियन्त्रणमा आएकाले छिमेकी बस्तीमा भने थप क्षति हुन पाएन ।

आगलागी के–कति कारणले भएको हो भन्नेबारे अहिलेसम्म खुल्न सकेको छैन। आगलागीबाट कुनै पनि मानवीय क्षति नभएको र घटनाको विषयमा थप अनुसन्धान भइरहेको प्रहरीले जनाएको छ।