इजरायल परीक्षा स्थगित, १७ हजार अन्योलमा

काठमाडौं । इजरायलमा केयरगिभर रोजगारीका लागि अनिवार्य अंग्रेजी भाषा परीक्षा व्यवस्थापनमा गम्भीर प्राविधिक तथा सञ्चालनगत समस्या देखिएपछि परीक्षा अनिश्चितकालका लागि स्थगित गरिएको छ । यसबाट १७ हजारभन्दा बढी नेपाली युवा प्रभावित भएका छन् ।

त्रिपुरेश्वरस्थित सीआईआईएनमार्फत सञ्चालन गरिएको क्याम्ब्रिज अपस्किल्स इंग्लिस टेस्टमा सहभागी परीक्षार्थीहरूले सर्भर समस्या, हेडसेट तथा कम्प्युटरको कमजोर व्यवस्था, अत्यधिक भिडभाड र अव्यवस्थित सञ्चालनका कारण परीक्षा प्रभावित भएको गुनासो गरेका छन् । सहभागीहरूका अनुसार एउटै हलमा करिब २ सय जनासम्म राखेर परीक्षा लिइएको थियो भने स्पिकिङ टेस्टका क्रममा आवाज स्पष्ट नसुनिने, आफ्नै आवाज रेकर्ड नहुने र प्रणालीले उत्तर नबुझ्ने समस्या देखिएको थियो ।

Advertisement

परीक्षार्थीहरूले प्रतिव्यक्ति ५ हजार रुपैयाँ शुल्क तिरे पनि मोबाइल, हेडफोनलगायतका सामग्री आफैंले ल्याउनुपरेको र परीक्षा एक घण्टामा सकिनुपर्नेमा ३–४ घण्टासम्म लम्बिएको बताएका छन् । मंगलबार परीक्षा दिएका ९ सयमध्ये ३५ जनामात्र ‘बी–१’ स्तरमा उत्तीर्ण भएपछि सफ्टवेयरमै समस्या वा चलखेल भएको आशंका समेत व्यक्त गरिएको छ ।

वैदेशिक रोजगार विभागले इजरायली पक्षबाट छनोट गरिएको प्रणालीमार्फत परीक्षा सञ्चालन गरिएको र प्राविधिक तथा व्यवस्थापकीय समस्याका कारण प्रक्रिया अवरुद्ध भएको जनाएको छ । परीक्षा स्थगित भएसँगै काठमाडौंमा तयारी गरेर बसेका तथा बाहिरबाट आएका परीक्षार्थी अन्योलमा परेका छन् ।

रोजगारी आवेदनको समयसीमा नजिकिँदै गर्दा परीक्षा रोकिएपछि आवेदन प्रक्रिया प्रभावित हुने जोखिम बढेको छ । परीक्षार्थीहरूले पुरानो र नयाँ दुवै प्रकारका भाषा परीक्षणलाई मान्यता दिन तथा वैकल्पिक व्यवस्था गर्न सरकारसँग माग गरेका छन् ।