विराटनगरको मिथिला थालीमा म्याद गुज्रेका सामग्री र अखाद्य रसायन

विराटनगर । खाद्य प्रविधि तथा गुण नियन्त्रण कार्यालय विराटनगरले गरेको अनुगमनमा विराटनगरस्थित मिथिला थाली नामक रेस्टुरेन्टमा खाद्य सुरक्षा सम्बन्धी गम्भीर लापरबाही भेटिएको छ ।

मिथिला थाली विराटनगर प्रालिमा गरिएको अनुगमनका क्रममा मिठाई उत्पादनमा मानव स्वास्थ्यका लागि हानिकारक मानिने ‘हाइड्रो’ नामक रसायन तथा कृत्रिम रङ प्रयोग गरिएको पाइएको अनुगमन टोलीले जनाएको छ । साथै, भण्डारण कक्षमा म्याद गुज्रेका खाद्य सामग्री फेला परेको र लामो समयदेखि प्रयोगविहीन अवस्थामा राखिएको पुष्टि भएको छ ।

Advertisement

त्यस्ता सामग्री तत्काल जफत गरी नष्ट गरिएको र करिब ५ किलो मिठाई पनि नियन्त्रणमा लिइएको कार्यालयले जनाएको छ । भान्साको सरसफाइ अत्यन्त कमजोर रहेको, उपकरण र सतह नियमित सफा नगर्ने तथा खाद्य सामग्री खुला रूपमा राखिएको पाइएको छ । अनुगमन अधिकारीहरूले सुधार नगरे कानुनी कारबाही हुने चेतावनी दिँदै तत्काल मापदण्ड पालना गर्न निर्देशन दिएका छन् ।

विराटनगर जस्तो व्यस्त व्यापारिक सहरमा यस्ता लापरबाही फेला पर्नु उपभोक्ता सुरक्षाका दृष्टिले चिन्ताजनक मानिएको छ । अनुगमन टोलीले पुनः निरीक्षण गर्ने जनाउँदै सुधार नभए कडा कानुनी प्रक्रिया अघि बढाइने स्पष्ट पारेको छ ।

स्थानीय प्रशासनले उपभोक्ता हित संरक्षणलाई प्राथमिकता दिँदै बजारमा खाद्य सुरक्षाका लागि अनुगमनलाई तीव्र बनाउने जनाएको छ । यस्ता घटनाले रेस्टुरेन्ट व्यवसायमा मापदण्ड पालनाको आवश्यकता उजागर गरेको छ ।

उपभोक्ताले पनि सचेत भई सेवा छनोट गर्नुपर्ने अवस्था देखिएको सरोकारवाला बताउँछन् । सम्बन्धित निकायले उपभोक्ता स्वास्थ्यमा कुनै सम्झौता नहुने स्पष्ट पारेको छ ।