पूर्वउपप्रधानमन्त्री एवं एमाले उपाध्यक्ष विष्णुप्रसाद पौडेल पक्राउ

काठमाडौं । पूर्वउपप्रधानमन्त्री तथा अर्थमन्त्री एवं नेकपा (एमाले)का उपाध्यक्ष विष्णुप्रसाद पौडेल पक्राउ परेका छन् । उनलाई सम्पत्ति शुद्धीकरणसम्बन्धी अनुसन्धानका क्रममा पक्राउ गरिएको प्रहरीले जनाएको छ ।

सम्पत्ति शुद्धीकरण विभागको अनुरोधमा प्रहरीले उनलाई नियन्त्रणमा लिएर थप अनुसन्धान अघि बढाएको छ । स्रोतका अनुसार पौडेलमाथि सेयर कारोबार तथा उनले आर्जन गरेको सम्पत्तिको स्रोतका बारेमा शंकास्पद देखिएका विषयमा अनुसन्धान भइरहेको छ । सोही अनुसन्धानको सिलसिलामा उनलाई पक्राउ गरिएको बताइएको छ ।

Advertisement

पार्टीको कार्यक्रमका लागि कर्णाली प्रदेशको सुर्खेत पुगेका बेला पौडेललाई कार्यक्रमस्थलबाटै नियन्त्रणमा लिइएको प्रहरी स्रोतले जनाएको छ । पक्राउपछि उनलाई तत्काल जिल्ला प्रहरी कार्यालयमा राखिएको छ । त्यहाँबाट काठमाडौं ल्याउने तयारी भइरहेको र त्यसका लागि हवाई वा स्थलमार्गमध्ये उपयुक्त विकल्पका बारेमा छलफल भइरहेको स्रोतको भनाइ छ ।

एमालेले हाल देशभरका प्रदेशमा पार्टी पुनर्गठनसम्बन्धी सुझाव संकलन अभियान सञ्चालन गरिरहेका बेला पार्टीका दोस्रो वरीयताका नेतामाथि भएको कारबाहीले राजनीतिक वृत्तमा चासो बढाएको छ । सम्पत्ति शुद्धीकरण विभागसँग सम्बद्ध उच्च स्रोतका अनुसार पौडेलसँग सम्बन्धित आर्थिक गतिविधि, विशेषगरी सेयर कारोबार र सम्पत्तिको स्रोतसम्बन्धी विषयमा थप प्रमाण संकलन तथा अनुसन्धान जारी रहेको छ ।

पक्राउसँगै उनीमाथिको अनुसन्धान प्रक्रिया थप तीव्र बनाइएको स्रोतले बतायो । यस विषयमा सम्पत्ति शुद्धीकरण विभाग, नेपाल प्रहरी वा एमालेका तर्फबाट भने औपचारिक प्रतिक्रिया सार्वजनिक भइसकेको छैन । अनुसन्धान जारी रहेकाले थप विवरण क्रमशः खुल्दै जाने बताइएको छ ।

त्यस्तै, सम्पत्ति शुद्धीकरण विभागले पौडेलको निवासमा छापा मारेको छ । उनलाई पक्राउ गर्नुभन्दा अगाडि काठमाडौंको भैँसेपाटीस्थित निवासमा छापा मारिएको हो । विवादित व्यवसायी दीपक भट्टसँग पौडेलको सम्बन्ध रहेको आशंका विभागले गरेको छ ।

विभागको टोली सोमबार दिउँसो १ बजे पौडेलको निवासमा पुगेको थियो । भैँसेपाटीस्थित घर जेनजी आन्दोलनमा जलाइएपछि उनी अहिले सोही क्षेत्रमा भाडाको घरमा बसिरहेका छन् । भाडाकै घरमा छापा हानिएको हो ।