उपाध्यक्ष पौडेलको गिरफ्तारी ‘प्रतिशोधपूर्ण’ भएको ओलीकाे दाबी

काठमाडौं  । नेकपा (एमाले) ले आफ्ना उपाध्यक्ष विष्णु  पौडेललाई सरकारले ‘अपहरणको शैलीमा’ गिरफ्तार गरेको भन्दै विरोध जनाएको छ । पार्टीको सांगठनिक सुदृढीकरणका सिलसिलामा सुर्खेतमा रहेका बेला पौडेललाई नियन्त्रणमा लिइएपछि एमालेले यसलाई सरकारको अधिनायकवादी र प्रतिशोधपूर्ण कदमको संज्ञा दिएको हो ।

एमाले अध्यक्ष केपी शर्मा ओलीले साेमबार प्रेस वक्तव्य जारी गर्दै उपाध्यक्ष पौडेलको गिरफ्तारी पूर्णतः गैरकानुनी र अलोकतान्त्रिक भएको दाबी गरेका छन् । वक्तव्यमा सरकारले विधिको शासन र सामान्य कानुनी प्रक्रियाको समेत धज्जी उडाउँदै जुनसुकै बेला सोधपुछ गर्न सकिने वा उपस्थित गराउन सकिने विकल्पलाई नियतवश लत्याएको आरोप लगाइएको छ ।

Advertisement

अध्यक्ष ओलीले उपाध्यक्ष पौडेलको गिरफ्तारीलाई आफ्नो पार्टी र नेतृत्वमाथि भइरहेको शृङ्खलाबद्ध प्रहार भएकाे बताएका छन् । विज्ञप्तिमा भनिएको छ, ‘यो दमनकारी कदम म र हाम्रो पार्टी नेकपा (एमाले) माथि लगातार भइरहेका शृङ्खलाबद्ध प्रहार र राजनीतिक षडयन्त्रको निरन्तरता हो भन्ने कुरा स्पष्ट छ । यसले सरकारको नाङ्गो प्रतिशोधको पराकाष्ठालाई उजागर गरेको छ ।’

एमालेका अनुसार उपाध्यक्ष पौडेल सुर्खेतको पूर्वनिर्धारित कार्यक्रम सकेर भोलिपल्टै काठमाडौँ फर्कने तयारीमा थिए । तर, असामान्य ढंगले नियन्त्रणमा लिइनुले सरकारको नियतमाथि प्रश्न उठेको एमालेको तर्क छ ।