सुनसरीमा डाक्टरले चलाएको कारले दुर्घटना गरायो : प्रहरीका वरिष्ठ सईको मृत्यु, पत्नी घाइते

चिमडी । सुनसरीमा डाक्टरले चलाएको ईभी कारले मंगलबार अपरान्ह मोटरसाइकललाई ठक्कर दिँदा नेपाल प्रहरीका वरिष्ठ सई (प्रहरी वरिष्ठ नायब निरीक्षक)को मृत्यु भएको छ । उनकी पत्नी घाइते भएकी छन् ।

हुलाकी राजमार्गअन्तर्गत बर्जु गाउँपालिका–६ नरह चोकनजिक अपरान्ह १२ बजेतिर दुर्घटना भएको सुनसरी प्रहरीका सूचना अधिकारी डीएसपी चन्द्रबहादुर खड्काले बताए । उनका अनुसार विराटनगरबाट बर्जु गाउँपालिकाको चिमडीतर्फ आउँदै गरेको प्र १–०२–००२ च ६२५२ नम्बरको ईभी कारले विपरीत दिशातर्फ जाँदै गरेको प्र १–०१–००३ प २६१२ नम्क्बरको मोटरसाइकललाई ठक्कर दिएको हो ।

Advertisement

दुर्घटनामा परेर मोटरसाइकलमा सवार प्रहरीका वरिष्ठ सई सप्तरीको विष्णुपुर गाउँपालिका–१ घर भएका अन्दाजी ५० वर्षीय लालकुमार यादवको मृत्यु भएको छ । दुर्घटनामा परी टाउको तथा शरीरका विभिन्न भागमा चोट लागेर गम्भीर घाइते भएका यादवलाई उपचारका लागि विराटनगरको विराट नर्सिङ होममा भर्ना गरिएको थियो । उपचारकै क्रममा दिउँसो ४ः१६ बजेतिर मृत्यु भएको डीएसपी खड्काले बताए ।

दुर्घटनामा परेर मोटरसाइकलको पछाडि सवार लालकुमारकी पत्नी ४७ वर्षीया रामपरी यादव घाइते भएकी छन् । रामपरीको दाहिने खुट्टामा चोट लागेको र अवस्था सामान्य रहेको प्रहरीले जनाएको छ । उनको विराट नर्सिङ होममा उपचार भइरहेको छ ।

मृतक यादव यसअघि जिल्ला प्रहरी कार्यालय बारामा कार्यरत थिए । उनले आफ्नो दरबन्दी कायम भएको जिल्ला प्रहरी कार्यालय सिराहामा जान असार ६ गते रमाना लिएका थिए । त्यसअघि बारामा कार्यरत रहँदा सई (प्रहरी नायब निरीक्षक)बाट वरिष्ठ सईमा बढुवा भएपछि उनको दरबन्दी सिराहा भएको थियो । जिल्ला प्रहरी कार्यालय सुनसरीका अनुसार रवाना बुझेर बाराबाट हिँडेको भए पनि उनी सिराहामा हाजिर भइनसकेको पाइएको छ ।

दुर्घटनालगत्तै प्रहरीले कार चालक अन्दाजी ५० वर्षीय डा. राजेन्द्र चौधरीलाई नियन्त्रणमा लिएर घटनाको अनुसन्धान सुरु गरेको छ । मोरङको कटहरी गाउँपालिका–३ घर भएका उनी रेडियोलोजिस्ट हुन् । चिमडी बजारमा एक्स–रे गर्नका लागि जाँदै गर्दा उनले चलाएको कारले दुर्घटना गराएको प्रहरीको प्रारम्भिक अनुसन्धानबाट खुलेको छ ।

दुर्घटनाका बेला कार तीव्र गतिमा रहेको स्थानीयले बताएका छन् । डा. चौधरी नेपाल मेडिकल एसोसिएसन विराटनगर शाखाका अध्यक्षसमेत हुन् । उनलाई इलाका प्रहरी कार्यालय दुहबीमा राखेर इन्स्पेक्टर शिवराम थापा नेतृत्वको टोलीले घटनाको थप अनुसन्धान गरिरहेको छ ।

कारले ठक्कर दिएपछि मोटरसाइकलमा आगलागीसमेत भएको थियो । स्थानीयको सक्रियतामा मोटरसाइकलको आगो नियन्त्रणमा लिइएको प्रहरीको भनाइ छ । प्रहरीका अनुसार मोटरसाइकललाई ठक्कर दिएपछि उछिट्टिएको कार विपरीत लेनमा पुगेर दुर्घटनामा परेको थियो । दुर्घटनाग्रस्त कारको पनि अगाडिको भागमा क्षति पुगेको छ । कार चालक डा. चौधरीलाई भने कुनै पनि चोटपटक नलागेको प्रहरीले जनाएको छ ।