रास्वपामा नयाँ नेतृत्व चयनका लागि मतदान हुँदै

चितवन । सत्तारुढ राष्ट्रिय स्वतन्त्र पार्टी (रास्वपा)को केन्द्रीय नेतृत्व चयन प्रक्रियाअन्तर्गत आज (शुक्रबार) पदाधिकारीका लागि मतदान हुँदैछ । पहिलो चरणमा केन्द्रीय सदस्यको मतपरिणाम सार्वजनिक भएपछि दोस्रो चरणमा पदाधिकारी चयनको प्रक्रिया अघि बढाइएको हो ।

पार्टीको निर्वाचन आयोगले शुक्रबार बिहान १० बजेदेखि मतदान सुरु गर्ने तयारी पूरा भएको जनाएको छ । मतदानबाट रास्वपाका ६ पदाधिकारी चयन हुनेछन् । निर्वाचनमा एक जना खुला उपसभापति, एक जना महिला उपसभापति, एक जना खुला महामन्त्री, दुई जना खुला सहमहामन्त्री तथा एक जना महिला सहमहामन्त्री पदका लागि प्रतिस्पर्धा हुनेछ ।

Advertisement

रास्वपाको विधानअनुसार पार्टीमा कुल १९ जना पदाधिकारी रहने व्यवस्था छ । तीमध्ये सभापति पदमा रवि लामिछाने यसअघि नै निर्विरोध निर्वाचित भइसकेका छन् । बाँकी पदमध्ये वरिष्ठ नेताको जिम्मेवारीमा प्रधानमन्त्री वालेन्द्र शाह (बालेन)लाई मनोनयन गरिने निश्चित भएको नेताहरूले बताएका छन् ।

विधानले उपसभापतिमा तीन जना रहने व्यवस्था गरेको छ । जसमा एक खुला, एक महिला र एक मनोनीत हुनेछन् । पुरुषतर्फको एक उपसभापतिमा डा. स्वर्णिम वाग्ले निर्विरोध निर्वाचित भइसकेका छन् । त्यस्तै, दुई जना महामन्त्रीमध्ये एक जना मनोनीत गरिने व्यवस्था छ ।

सहमहामन्त्री पाँच जना रहने प्रावधानअनुसार दुई जना खुला, एक जना महिला र दुई जना मनोनीत हुनेछन् । त्यसैगरी एक जना प्रवक्ता तथा तीन जना सहप्रवक्ता रहनेछन् । जसमा सहप्रवक्तामध्ये एक जना महिला अनिवार्य रहने व्यवस्था छ । यी सबै पद मनोनयनमार्फत पूर्ति गरिनेछन् ।

यस्तै, पार्टीको विधानले एक जना कोषाध्यक्ष र दुई जना सहकोषाध्यक्ष पनि समावेशी सिद्धान्तका आधारमा मनोनयन गर्ने व्यवस्था गरेको छ । मतदानबाट निर्वाचित हुने पदाधिकारीहरूले रास्वपाको नयाँ संगठनात्मक संरचनालाई पूर्णता दिनेछन् । बाँकी मनोनयन हुने पदहरू पार्टी नेतृत्वले विधानअनुसार पछि टुंग्याउनेछ ।