रोमाञ्चक पुनरागमनले मोरक्को अन्तिम १६ मा, नेदरल्यान्ड्सका प्रशिक्षकको राजीनामा

अमेरिका । मोरक्कोले रोमाञ्चक पुनरागमन गर्दै नेदरल्यान्ड्सलाई पेनाल्टी सुटआउटमा ३–२ ले पराजित गरी विश्वकप फुटबलको अन्तिम १६ मा स्थान बनाएको छ ।

निर्धारित ९० मिनेट र अतिरिक्त समय १–१ को बराबरीमा सकिएपछि खेलको निर्णय पेनाल्टीमार्फत भएको थियो । अब मोरक्कोले क्वार्टरफाइनल प्रवेशका लागि क्यानडासँग प्रतिस्पर्धा गर्नेछ ।

मोन्टेरेमा भएको खेलमा अधिकांश समय मोरक्कोले दबाब कायम राखे पनि नेदरल्यान्ड्सका गोलरक्षक बार्ट भेर्ब्रुगेनले उत्कृष्ट प्रदर्शन गर्दै धेरै अवसर विफल पारे । दोस्रो हाफको ७२औँ मिनेटमा वाउट वेघोर्स्टको हेडमार्फत आएको बललाई क्रिसेन्सियो समरभिलले मिलाइदिएपछि कोडी गाक्पोले गोल गर्दै नेदरल्यान्ड्सलाई अग्रता दिलाएका थिए । हालै गर्भावस्थामै आफ्नो सन्तान गुमाएका गाक्पो गोलपछि भावुक बनेका थिए ।

तर, इन्जुरी समयको सुरुआतमै चेम्सदिन ताल्दीको क्रसमा इस्सा डिओपले हेडमार्फत बराबरी गोल गरेपछि खेल अतिरिक्त समयमा पुगेको थियो । अतिरिक्त समयमा दुवै टोलीले अवसर सिर्जना गरे पनि गोल हुन नसकेपछि पेनाल्टी सुटआउटमा निर्णय लिइयो । मोरक्कोका लागि सौफियान रहिमी, चेम्सदिन ताल्दी र इस्माइल साइबारीले गोल गरे भने अन्तिम प्रहारमा साइबारीले टोलीलाई ऐतिहासिक जित दिलाए ।

यस हारसँगै नेदरल्यान्ड्स विश्वकपबाट बाहिरिएको छ । त्यसलगत्तै प्रशिक्षक रोनाल्ड कोम्यानले पदबाट राजीनामा दिएका छन् । उनले आफ्नो व्यवस्थापकीय यात्राप्रति गर्व व्यक्त गर्दै पछिल्ला वर्षहरूले फुटबलभन्दा जीवन र स्वास्थ्य अझ महत्वपूर्ण रहेको अनुभूति गराएको बताएका छन् । उनकी पत्नी बार्टिना स्तन क्यान्सरसँग संघर्ष गरिरहेकी छन् ।

उता पेनाल्टी चुकाएका जस्टिन क्लुइभर्ट, क्विन्टेन टिम्बर र क्रिसेन्सियो समरभिल सामाजिक सञ्जालमा जातीय विभेद र घृणायुक्त टिप्पणीको निशाना बनेपछि रोयल डच फुटबल संघ (केएनभीबी)ले घटनाको कडा निन्दा गर्दै दोषीमाथि कानुनी कारबाही अघि बढाउने चेतावनी दिएको छ । संघले खेलाडीमाथिको जातीय दुर्व्यवहार अस्वीकार्य भएको उल्लेख गर्दै आवश्यक परे सरकारी अभियोजन कार्यालयमा उजुरी दर्ता गरिने जनाएको छ ।