मानुषी लघुवित्तको जीवन विकाससँगको मर्जर हुने प्रस्ताव पारित

काठमाडौं । मानुषी लघुवित्त वित्तीय संस्था लिमिटेडको सातौँ वार्षिक साधारण सभा सम्पन्न भएको छ । काभ्रेको बनेपामा आयोजित सभाले संस्थाको आगामी दिशा तय गर्ने महत्त्वपूर्ण निर्णयहरू गरेको छ ।

साधारण सभाको मुख्य आकर्षणको रूपमा रहेको जीवन विकास लघुवित्त र युनिक नेपाल लघुवित्तसँग मर्जर (एकीकरण) हुने विशेष प्रस्तावलाई सभाले सर्वसम्मतिले पारित गरेको छ । यस मर्जरपछि संस्थाको पुँजीगत आधार बलियो हुने र सेवा प्रवाह थप प्रभावकारी हुने अपेक्षा गरिएको छ ।

सभाले सञ्चालक समितिको तर्फबाट प्रस्तुत आर्थिक वर्ष २०८१ / ०८२ को वार्षिक प्रतिवेदन समेत पारित गरेको छ । साथै, संस्थाको कार्यसम्पादनलाई थप गति दिनका लागि सभाले २ जना सञ्चालकहरूको नियुक्तिलाई अनुमोदन समेत गरेको छ ।

काभ्रेको बनेपामा केन्द्रीय कार्यालय रहेको मानुषी लघुवित्तले हाल १४ जिल्लामा ३६ वटा शाखाहरू मार्फत वित्तीय सेवा प्रदान गर्दै आइरहेको छ । संस्थाको वित्तीय अवस्था सुदृढ देखिन्छ, जसमा १० करोड ९३ लाख ७५ हजार रुपैयाँ चुक्ता पुँजी छ भने जगेडा कोषमा ४ करोड ५३ लाख ४३ हजार ९ सय ५० रुपैयाँ सञ्चित रहेको छ ।