नेपालका दुवै प्रहरी प्रमुख न्युयोर्क प्रस्थान

काठमाडौं । संयुक्त राष्ट्र संघको प्रधान कार्यालय न्युयोर्कमा आयोजना हुने पाँचौँ ‘युएन पुलिस समिट’ मा सहभागी हुन नेपालका दुवै सुरक्षा निकायका प्रमुखहरू आइतबार अमेरिका प्रस्थान गरेका छन् ।

नेपाल प्रहरीका महानिरीक्षक (आइजिपी) दानबहादुर कार्की र सशस्त्र प्रहरी महानिरीक्षक (आइजिपी) नारायणदत्त पौडेल समिटमा भाग लिन न्युयोर्कतर्फ प्रस्थान गरेका हुन् । असार २३ र २४ गते सञ्चालन हुने उक्त उच्चस्तरीय सम्मेलनमा विश्वभरका प्रहरी प्रमुखहरूको सहभागिता रहने छ ।

सम्मेलनमा विश्वव्यापी सुरक्षा चासो र प्रहरी कार्यमा भित्रिएका आधुनिक प्रविधिका विषयमा बृहत् छलफल हुने कार्य तालिका छ। विशेष गरी  ‘रिफ्लेक्सन अन द फ्युचर अफ युएन पुलिस’,  ‘लेभरेजिङ न्यु टेक्नोलोजी’ (नयाँ प्रविधिको अधिकतम प्रयोग) र अन्तर्राष्ट्रिय सुरक्षा सहयोग सुदृढीकरण जस्ता विषयमा सत्रहरू सञ्चालन हुनेछन् । यस्तै, शान्ति स्थापना कार्यलाई थप प्रभावकारी बनाउन भाषा तालिम र ‘जेन्डर रेस्पोन्सिभ पोलिसी’ (लैंगिक उत्तरदायी नीति) का विषयमा पनि एजेन्डा तय गरिएको छ।

भ्रमणका क्रममा प्रहरी महानिरीक्षक दानबहादुर कार्कीले विभिन्न देशका सुरक्षा निकायका प्रतिनिधिहरूसँग  ‘साइडलाइन’ वार्ता गर्ने कार्यक्रम छ । उनले संयुक्त राष्ट्र संघका उच्च पदाधिकारीहरूसँगै संयुक्त अरब इमिरेट्स (युएई) को प्रतिनिधिमण्डलसँग समेत द्विपक्षीय हित र सुरक्षा सहयोगका विषयमा छलफल गर्ने जनाइएको छ।
न्युयोर्क प्रस्थान गर्नुअघि दुवै संगठनका प्रमुखहरूलाई त्रिभुवन अन्तर्राष्ट्रिय विमानस्थलमा प्रहरी अतिरिक्त महानिरीक्षक (एआईजी) प्रहरी नायब महानिरीक्षक (डीआईजी) लगायतका वरिष्ठ अधिकारीहरूले बिदाइ गरेका थिए ।

आइजिपी कार्कीको अनुपस्थितिमा नेपाल प्रहरी प्रधान कार्यालयको दैनिक प्रशासनिक कार्यको जिम्मेवारी प्रहरी अतिरिक्त महानिरीक्षक (एआईजी) राजन अधिकारीले सम्हाल्ने गरी तोकिएको छ ।

यो सम्मेलनले अन्तर्राष्ट्रिय शान्ति स्थापनामा नेपाली सुरक्षाकर्मीको भूमिकालाई थप सुदृढ बनाउन र आधुनिक सुरक्षा प्रविधिबारे अनुभव आदानप्रदान गर्न महत्त्वपूर्ण अवसर प्रदान गर्ने अपेक्षा गरिएको छ ।