सरकारको उद्देश्य व्यवसायी थुन्ने होइन, देश बनाउने हो : प्रधानमन्त्री

काठमाडौं । प्रधानमन्त्री बालेन्द्र (बालेन) शाहले उद्योगी तथा व्यवसायीलाई थुन्ने सरकारको कुनै उद्देश्य नभएको स्पष्ट पारेका छन् । बुधबार नेपाल उद्योग वाणिज्य महासंघ, नेपाल उद्योग परिसंघ र नेपाल चेम्बर अफ कमर्सका प्रतिनिधिहरूसँगको छलफलमा उनले यस्तो बताएका हुन् ।

छलफलका क्रममा परिसंघका निवर्तमान अध्यक्ष राजेशकुमार अग्रवालले आरोपितको कुरा नसुनी पक्राउ गर्ने प्रवृत्ति अन्त्य गर्न र अग्रिम जमानतको कानुनी व्यवस्था गर्न माग गरेका थिए ।

जवाफमा प्रधानमन्त्रीले निजी क्षेत्र देश विकासको महत्त्वपूर्ण साझेदार भएको बताउँदै सरकारले व्यवसायीलाई साथमै लिएर अघि बढ्ने आश्वासन दिए ।

प्रधानमन्त्री शाहले निजी क्षेत्रका समस्या समाधानका लागि विज्ञसहितको समिति गठन गर्ने र नीतिगत तथा प्रक्रियागत अवरोधहरू हटाउने प्रतिबद्धता जनाए । उनले व्यवसायीहरूलाई आफ्ना विशिष्ट समस्याहरू स्पष्ट रूपमा ल्याउन आग्रह गर्दै लगानीमैत्री वातावरण निर्माण र रोजगारी सिर्जनामा सरकार सकारात्मक रहेको बताए ।

सरकारसँगको यस सकारात्मक संवादपछि निजी क्षेत्रका प्रतिनिधिहरू उत्साहित देखिएका छन् । छलफलमा महासंघका अध्यक्ष अञ्जन श्रेष्ठ, परिसंघका राजेशकुमार अग्रवाल र चेम्बरका अध्यक्ष कमलेशकुमार अग्रवाल लगायतको सहभागिता थियो ।