सुनसरीमा पिकअप दुर्घटना, चालकको मृत्यु

इनरुवा । पूर्व–पश्चिम राजमार्गअन्तर्गत सुनसरीको कोशी गाउँपालिका–८ केराबारीमा बुधबार राति पिकअप गाडी दुर्घटना हुँदा चालकको मृत्यु भएको छ । पिकअपमा सवार अर्का व्यक्ति घाइते भएका छन् ।

प्रहरीका अनुसार भण्टाबारीबाट लौकहीतर्फ आउँदै गरेको प्र १–०२–००२ च ४८३१ नम्बरको खाली पिकअप गाडी आफैं अनियन्त्रित भएर राति १०ः५० बजेतिर दुर्घटनामा परेको हो । दुर्घटनामा पिकअप चालक मोरङको रंगेली नगरपालिका–३ दर्वेशाका ४२ वर्षीय पदम राईको मृत्यु भएको हो ।

पिकअपले च्यापिएको गम्भीर घाइते अवस्थामा भेटिएका राईलाई उद्धार गरेर उपचारका लागि जिल्ला अस्पताल इनरुवा पुर्याउनसाथ राति ११ः५० बजेतिर चिकित्सकले मृत घोषणा गरिदिएको सुनसरी प्रहरीका सूचना अधिकारी डीएसपी चन्द्रबहादुर खड्काले बताए । उनका अनुसार दुर्घटनामा परेर पिकअपमा सवार सिराहाको लहान नगरपालिका घर भइ विराटनगर महानगरपालिका–१३ मा बस्दै आएका ३७ वर्षीय सन्तोषकुमार साह घाइते भएका छन् । सामान्य अवस्थाका उनको इनरुवामै उपचार भइरहेको प्रहरीले जनाएको छ ।

सडकको बीच भागमा पल्टिएको पिकअपलाई हटाइसकिएको प्रहरीले जनाएको छ । घटनास्थल भण्टाबारीबाट करिब २ किलोमिटर पूर्वमा पर्छ । दुर्घटनाको कारण प्रष्ट हुन सकेको छैन । प्रहरीले घटनाको अनुसन्धान सुरु गरेको छ ।