सिंघिया खोलाले बगाएर ल्याउँदै गरेको अवस्थामा शव फेला

विराटनगर । सिंघिया खोलाले बगाएर ल्याउँदै गरेको अवस्थामा मंगलबार साँझ एक जना पुरुषको शव फेला परेको छ ।

मोरङको जहदा गाउँपालिका–३ र विराटनगर महानगरपालिका–१४ को सिमानामा शव भेटिएको हो । स्थानीयले सिंघिया खोलामा शव देखेपछि साँझ ५ बजेतिर प्रहरीलाई खबर गरेका थिए । प्रहरीका अनुसार खोलाको किनारमा शव फेला परेका अन्दाजी ३०–३५ वर्षीय पुरुषको पहिचान खुल्न सकेको छैन ।

इलाका प्रहरी कार्यालय रानीका इन्स्पेक्टर प्रवीण घिमिरे नेतृत्वको टोलीले आवश्यक कानुनी प्रक्रिया पूरा गरी खोलाबाट बाहिर निकालेर शवलाई पोस्टमार्टमका लागि विराटनगरको कोशी अस्पताल पठाएको छ । मोरङ प्रहरीका सूचना अधिकारी डीएसपी मकेन्द्रकुमार मिश्रले शवको सनाखतको प्रयास भइरहेको जानकारी दिए ।

‘खोलाले बगाएर ल्याएको अवस्थामा शव फेला परेको छ । तर, हालसम्म पहिचान खुल्न सकेको छैन । सनाखतका लागि सबैतिर हुलिया गरिसकिएको छ,’ उनले भने । डीएसपी मिश्रले घटनाको थप अनुसन्धान भइरहेको जानकारी दिए ।