सुकुम्वासी पुनर्स्थापनामा संसद्‌मा जरुरी प्रस्ताव

काठमाडौं । विपक्षी चार दलले भूमिहीन, सुकुम्वासी तथा अव्यवस्थित बसोबासीको संरक्षण र दिगो पुनर्स्थापनाको माग गर्दै प्रतिनिधिसभामा जरुरी सार्वजनिक महत्त्वको प्रस्ताव दर्ता गरेका छन् ।

नेपाली कांग्रेस संसदीय दलका नेता भीष्मराज आङ्देम्बेले दर्ता गरेको प्रस्तावमा नेकपा (एमाले)का प्रमुख सचेतक ऐन मगर, नेपाली कम्युनिस्ट पार्टी (नेकपा)का प्रमुख सचेतक युवराज दुलाल र श्रम संस्कृति पार्टीका प्रमुख सचेतक आरेन राई समर्थक छन् ।

प्रस्तावमा संविधानले सुनिश्चित गरेको आवास तथा सम्मानपूर्वक बाँच्न पाउने हक कार्यान्वयन गर्न सरकारको ध्यानाकर्षण गराउँदै डोजर, स्थानान्तरण वा बाढीबाट प्रभावित परिवारलाई वास्तविक क्षतिपूर्ति दिन, तीन महिनाभित्र स्थायी पुनर्स्थापनाको योजना ल्याउन र वास्तविक भूमिहीन तथा योग्य सुकुम्वासीको पहिचान गरी निश्चित समयभित्र लालपुर्जा वितरण गर्न माग गरिएको छ ।