मोरङको केराबारीमा टिपरको ठक्करबाट वृद्धाको मृत्यु

विराटनगर । मोरङको केराबारीमा शुक्रबार बिहान टिपरको ठक्करबाट एक जना वृद्धा महिलाको मृत्यु भएको छ ।

टिपरले ठक्कर दिँदा केराबारी गाउँपालिका–५ की ७० वर्षीया विष्णुमाया मगरको मृत्यु भएको प्रहरीले जनाएको छ । बालुवा लोड गरेर केराबारीबाट धरानतर्फ जाँदै गरेको को १ ख ६७९० नम्बरको टिपरले मगरलाई केराबारी–५ शान्ति चोकमा बिहान ८ः५० बजेतिर ठक्कर दिएको थियो ।

दुर्घटनामा परेर गम्भीर घाइते भएकी वृद्धालाई तत्काल उद्धार गरेर उपचारका लागि धरानस्थित बीपी कोइराला स्वास्थ्य विज्ञान प्रतिष्ठान लगिएको थियो । अस्पताल पुर्याउनसाथ उनलाई चिकित्सकले मृत घोषणा गरिदिएको मोरङ प्रहरीका सूचना अधिकारी डीएसपी मकेन्द्रकुमार मिश्रले बताए ।

उनका अनुसार घरमै पालेको खसी खेदाउने क्रममा बाटो क्रस गर्न खोज्दा वृद्धालाई टिपरले ठक्कर दिएको प्रारम्भिक अनुसन्धानबाट खुलेको छ । दुर्घटना लगत्तै प्रहरी टोली घटनास्थल पुगेको थियो । टिपर र चालक संखुवासभाको चैनपुर नगरपालिका–११ घर भइ सुनसरीको धरान उपमहानगरपालिका–१३ मा बस्दै आएका २३ वर्षीय विक्रम माझीलाई इलाका प्रहरी कार्यालय केराबारीका वरिष्ठ सई देवेन्द्र सुवेदी नेतृत्वको टोलीले पक्राउ गरेको छ ।

पक्राउ गरिएका चालकलाई अनुसन्धान एवं कारबाहीका लागि इलाका प्रहरी कार्यालय बेलबारीमा लगिएको छ । इन्स्पेक्टर राजीव गिरी नेतृत्वको टोलीले घटनाको विस्तृत अनुसन्धान गरिरहेको छ ।