झापामा करेन्ट लागेर दुई युवकको मृत्यु

विराटनगर । झापाका करेन्ट लागेर दुई युवककाे मृत्यु भएकाे छ । कचनकवल गाउँपालिका र गौरादह नगरपालिकामा भएका छुट्टाछुट्टै घटनामा दुई युवकले ज्यान गुमाएका हुन् ।

जिल्ला प्रहरी कार्यालय झापाका अनुसार कचनकवल गाउँपालिका–३ पाँचबिगेका २४ वर्षीय कमल गदाइलीको जंगली हात्ती रोकथामका लागि आफ्नै बारीमा जडान गरिएको विद्युतीय तारको करेन्ट लागेर मृत्यु भएको हो ।

Advertisement

शुक्रबार राति करिब ९ बजे करेन्ट लागेर गम्भीर घाइते भएका गदाइलीलाई तत्काल उपचारका लागि प्रादेशिक अस्पताल भद्रपुर लगिएको थियो। तर, अस्पताल पुर्‍याउनासाथ चिकित्सकले उनलाई मृत घोषणा गरेका थिए ।

झापाकै गौरादह नगरपालिका–६ बिरवल चोकका २५ वर्षीय बिनोद शर्माको पनि आफ्नै घरमा करेन्ट लागेर मृत्यु भएको छ । बिहीबार साँझ करिब ७:४५ बजे घरमा रहेको फलामको स्ट्यान्ड भएको पंखा चलाउने क्रममा उनलाई करेन्ट लागेको प्रहरीले जनाएको छ ।

करेन्ट लागेर गम्भीर घाइते भएका शर्मालाई उपचारका लागि दमकस्थित लाइफलाइन अस्पताल पुर्‍याइएको थियो । उनको उपचारकै क्रममा मृत्यु भएको प्रहरीले जनाएकाे छ ।