दुर्घटनाका घाइते सञ्चारकर्मीलाई नयन मिडिया फाउन्डेसनद्वारा बिमा रकम हस्तान्तरण

Share this
672shares
मुलुकी खबर
मुलुकी खबर
clock२०८३ साउन ६, बुधबार १७:५४

इटहरी । इटहरीमा भएको सवारी दुर्घटनामा घाइते भएका नेपाल टेलिभिजन इटहरी च्यानलका कर्मचारी रवीन्द्रकुमार चौधरीलाई नयन मिडिया फाउन्डेसनले दुर्घटना बिमाअन्तर्गत प्राप्त ३२ हजार २ सय ५५ रुपैयाँ हस्तान्तरण गरेको छ ।

बुधबार नेपाल टेलिभिजन इटहरी च्यानलको कार्यालयमा आयोजित कार्यक्रममा फाउन्डेसनका अध्यक्ष पवन अधिकारी, निर्देशक माधव सुवेदी तथा बिमा संयोजक देवराज पुरीले संयुक्त रूपमा चौधरीलाई बिमा दाबीबापतको रकम हस्तान्तरण गरेका हुन् । कार्यक्रममा नेपाल टेलिभिजन इटहरी च्यानलका प्रमुख वसन्त रुपाखेतीले दुर्घटनापछि प्राप्त बिमा रकमले घाइते कर्मचारीलाई आर्थिक राहत पुग्ने विश्वास व्यक्त गरे ।

सञ्चारकर्मीको सुरक्षालाई प्राथमिकतामा राख्दै नयन मिडिया फाउन्डेसनले निःशुल्क दुर्घटना बिमा कार्यक्रम सञ्चालन गर्नु सराहनीय पहल भएको उल्लेख गर्दै उनले यस्ता अभियानले सञ्चार क्षेत्रमा कार्यरत पत्रकार तथा सञ्चारकर्मीलाई थप सुरक्षित, उत्साहित र आत्मविश्वासी बनाउन सहयोग पुग्ने बताए ।

नयन मिडिया फाउन्डेसनले प्रत्येक वर्ष आयोजना गर्दै आएको ‘कोशी एक्सिलेन्स अवार्ड’को अवसरमा सुनसरीमा क्रियाशील सञ्चारकर्मीहरूको निःशुल्क दुर्घटना बिमा गर्दै आएको छ । फाउन्डेसनका बिमा संयोजक देवराज पुरीका अनुसार चालु वर्ष सुनसरीका ३१४ जना सञ्चारकर्मीको निःशुल्क दुर्घटना बिमा गरिएको छ ।

फाउन्डेसनले सञ्चारकर्मीको सुरक्षा र सामाजिक उत्तरदायित्वलाई केन्द्रमा राखेर सञ्चालन गरिरहेको उक्त कार्यक्रमले दुर्घटनामा परेका पत्रकार तथा सञ्चारकर्मीलाई आर्थिक राहत उपलब्ध गराउनुका साथै पत्रकारिता पेसाप्रति सुरक्षा, विश्वास र मनोबल अभिवृद्धि गर्न महत्वपूर्ण योगदान पुर्‍याउँदै आएको छ ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.