२०८३ श्रावण ७, बिहीबार १५:०१
सिन्धुली । अरिंगाल पोल्ने क्रममा रुखबाट लडेर सिन्धुलीको गोलन्जोर गाउँपालिका–६ का ४३ वर्षीय विष्णु भनिने लोकेन्द्र सार्कीको मृत्यु भएको छ । रुखबाट लडेर गम्भीर घाइते भएका उनको समयमा उपचार नपाउँदा ज्यान गएको प्रहरीले जनाएको छ ।
सार्कीको घरबाट १ किलोमिटर उत्तरमा पर्ने जंगलमा सल्लाको रुखमा रहेको अरिंगालको गोलो पोल्ने क्रममा घटना भएको हो । प्रहरीका अनुसार गोलो पोलेर रुखबाट ओर्लने क्रममा लडेर बुधबार राति ८ः३० बजेतिर उनी गम्भीर घाइते भएका थिए ।
गम्भीर अवस्थाका उनलाई आफन्तले घरमै ल्याएर राखेका थिए । उपचारका लागि अस्पताल लगेनन् । समयमा उपचार नपाइकन बिहीबार बिहान उनको मृत्यु भएको प्रहरीले जनाएको छ ।
इलाका प्रहरी कार्यालय खुर्कोटबाट खटिएको इन्स्पेक्टर विष्णुप्रसाद पौडेल नेतृत्वको टोली घटनास्थल पुगेर कानुनी प्रक्रिया पूरा गरी शवलाई पोस्टमार्टमका लागि पठाएको छ । प्रहरीले घटनाको थप अनुसन्धान भइरहेको जनाएको छ ।
इमेल: [email protected]
ठेगाना: विराटनगर–२
मोबाइल नं. : ९८१९३३६४१६, ९८५२०५१७६५, ९८०७०१४०८१
कम्पनी रजिष्ट्रार दर्ता नं. : ३५०५५२–८१/८२
सूचना विभाग दर्ता नं. : ४६८३–२०८१/२०८२
सम्पादक : किशोर बुढाथोकी
×