प्रश्नपत्र भाइरल प्रकरणमा २ जना पक्राउ

काठमाडौं । त्रिभुवन विश्वविद्यालय व्यवस्थापन संकायको एमबीएस प्रथम सेमेस्टरको प्रश्नपत्र सामाजिक सञ्जालमा बाहिरियाएको आरोपमा प्रहरीले २ दुई जनालाई नियन्त्रणमा लिएको छ ।

पक्राउ पर्नेमा ‘सुलभ सर’ भनिने व्यक्तिसहित २ जना रहेको र उनीहरूलाई नेपाल प्रहरीको केन्द्रीय अनुसन्धान ब्युरो (सीआईबी) ले आइतबार बिहान नियन्त्रणमा लिएर थप अनुसन्धान अघि बढाएको छ ।

Advertisement

प्रश्नपत्र बाहिरिएको समाचार सार्वजनिक भएलगत्तै शिक्षामन्त्री सस्मित पोखरेलले प्रहरी महानिरीक्षक (आईजीपी) दानबहादुर कार्कीसँग छलफल गर्दै घटनामा संलग्नहरूलाई तत्काल नियन्त्रणमा लिन निर्देशन दिएका थिए ।

मन्त्री पोखरेलले शनिबार राति मन्त्रालयमै पुगेर प्रहरीका उच्च अधिकारी र त्रिविका पदाधिकारीहरूसँग छानबिन समिति गठन तथा आवश्यक कदमबारे छलफल गरेका थिए । प्रहरीको प्रारम्भिक अनुसन्धान अनुसार पक्राउ परेका व्यक्तिहरूले सामाजिक सञ्जालमार्फत प्रश्नपत्र सार्वजनिक गरेको खुलेको छ ।

गत साउन ८ गते सञ्चालित स्नातकोत्तर तहको ‘अर्गनाइजेसनल बिहेभियर’ विषयको परीक्षा सुरु भएको ५ मिनेटमै ‘एमबीएस फर्स्ट सेम सेक्सन सी’ नामक ह्वाट्सएप ग्रुपमा प्रश्नपत्र पठाइएको पाइएको हो । फेसबुक पेज ‘टीयू स्टुडेन्ट्स’ ले ह्वाट्सएप ग्रुपका स्क्रिनसटहरू सार्वजनिक गर्दै त्रिवि प्रशासनको ध्यानाकर्षण गराएपछि यो विषय सतहमा आएको हो ।