मोरङमा शिक्षकको कुटपिटबाट विद्यार्थीको कानको जाली फुट्यो

विराटनगर । मोरङको पथरीशनिश्चरेस्थित एक विद्यालयमा शिक्षकको कुटपिटबाट एक विद्यार्थी गम्भीर घाइते भएका छन् । घटनापछि शिक्षकलाई प्रहरीले नियन्त्रणमा लिएर अनुसन्धान सुरु गरेको छ ।

प्रहरीका अनुसार अनुसार साउन ६ गते बिहान करिब १०ः१५ बजे पथरीशनिश्चरे नगरपालिका–५ स्थित अमरसिंह माध्यमिक विद्यालयमा कक्षा ८ मा अध्ययनरत १५ वर्षीय सन्देश चौधरीमाथि शिक्षक प्रकाश अधिकारीले कुटपिट गरेका हुन् । झापाको गौरादह नगरपालिका–४ घर भएका ३८ वर्षीय शिक्षक अधिकारीले बिहानको प्रार्थना सकिएपछि सन्देश विद्यालयको चौतारोमा बसेको देखेका थिए ।

Advertisement

कक्षाकोठामा नगएको विषयमा सोधपुछ गर्ने क्रममा शिक्षक अधिकारीले कुटपिट गर्दा सन्देशको बाँया कानको जाली फुटेको प्रारम्भिक अनुसन्धानबाट खुलेको मोरङ प्रहरीका सूचना अधिकारी डीएसपी मकेन्द्रकुमार मिश्रले बताए । विद्यार्थीको अवस्था थप जटिल बन्दै गएपछि अभिभावकले उपचारका लागि शनिबार विराटनगरको नोबेल शिक्षण अस्पताल लगेका थिए ।

उपचारका क्रममा कानको जाली फुटेको पत्ता लागेपछि अभिभावकले प्रहरीलाई घटनाको जानकारी दिएका हुन् । शिक्षकको कुटाइबाट घाइते भएका सन्देशको अवस्था मध्यम रहेको र उपचार भइरहेको प्रहरीले जनाएको छ ।

घटनाको तीन दिनपछि साउन ९ गते साँझ करिब ५ः३० बजे घाइतेका बुवा महिनारायण चौधरीले इलाका प्रहरी कार्यालय पथरीमा जानकारी गराएका थिए । त्यसलगत्तै अस्थायी प्रहरी पोस्ट हसन्दहबाट खटिएको टोलीले शिक्षक अधिकारीलाई पक्राउ गरेर इलाका प्रहरी कार्यालय पथरीमा पुर्याएको हो ।

शिक्षकद्वारा विद्यार्थीमाथि भएको कुटपिटको घटनाले विद्यालयमा विद्यार्थीको सुरक्षा, अनुशासन कायम गर्ने तरिका तथा शारीरिक दण्डको प्रयोगका बारेमा प्रश्न उठेको छ । नेपालको प्रचलित कानुनअनुसार विद्यालयमा विद्यार्थीमाथि शारीरिक वा मानसिक यातना दिन नपाइने व्यवस्था छ । प्रहरीले घटनाको वास्तविकता, कुटपिटको कारण र अन्य पक्षका बारेमा अनुसन्धान गरिरहेको छ ।