अधिकांश स्थानमा वर्षाको सम्भावना

काठमाडौं । देशभर मनसुनी प्रणाली सक्रिय रहेकाले आज (बिहीबार) अधिकांश स्थानमा वर्षाको सम्भावना रहेको छ ।

मौसम पूर्वानुमान महाशाखाका अनुसार मनसुनको न्यूनचापीय रेखा पूर्वी नेपालमा सरदर स्थानको आसपास र पश्चिमी नेपालमा सामान्यभन्दा उत्तरतर्फ रहेकाले वर्षा गराउने प्रणाली अझ प्रभावशाली बनेको हो । हाल कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशमा सामान्यदेखि पूर्ण बदली रहेको छ भने मधेश प्रदेशमा आंशिक बदली छ ।

Advertisement

कोशी, बागमती, गण्डकी, लुम्बिनी र कर्णालीका केही स्थान तथा सुदूरपश्चिमका एक–दुई स्थानमा हल्कादेखि मध्यम वर्षा भइरहेको महाशाखाले जनाएको छ । महाशाखाका अनुसार बिहीबार दिउँसो देशभर सामान्यदेखि पूर्ण बदली रहनेछ ।

हिमाली क्षेत्रका केही स्थानमा तथा पहाडी भू–भागका केही स्थानमा चट्याङसहित मध्यम वर्षा हुने सम्भावना छ । कोशी र सुदूरपश्चिमका तराईका केही स्थान, मधेश प्रदेश तथा बागमती, गण्डकी र लुम्बिनीका तराई क्षेत्रमा पनि मेघगर्जन र चट्याङसहित वर्षा हुन सक्ने पूर्वानुमान गरिएको छ ।

यस्तै, कोशी र बागमती प्रदेशका हिमाली तथा पहाडी क्षेत्रका एक–दुई स्थान तथा कर्णाली र सुदूरपश्चिमका पहाडी भू–भागमा भारी वर्षाको सम्भावना रहेकाले आवश्यक सतर्कता अपनाउन महाशाखाले आग्रह गरेको छ । राति पनि मनसुनी प्रभाव कायम रहने जनाइएको छ ।

राति हिमाली र पहाडी भू–भागका केही स्थानमा मध्यम वर्षा हुने सम्भावना रहेको छ । कोशी, बागमती, गण्डकी र सुदूरपश्चिमका तराईका केही स्थान, मधेश प्रदेश तथा लुम्बिनीका तराई क्षेत्रमा चट्याङसहित वर्षा हुन सक्ने अनुमान छ ।

महाशाखाले रातिको समयमा पनि कोशी प्रदेशका पहाडी र तराई क्षेत्र तथा बागमती र गण्डकी प्रदेशका पहाडी भूभागका एक–दुई स्थानमा भारी वर्षा हुन सक्ने भएकाले नदी–नाला आसपास र पहिरोको जोखिम रहेका क्षेत्रमा विशेष सावधानी अपनाउन आग्रह गरेको छ ।