बीपी प्रतिष्ठानका इन्जिनियरविरुद्ध भ्रष्टाचार मुद्दा

Share this
736shares
मुलुकी खबर
मुलुकी खबर
clock२०८३ साउन १५, शुक्रबार १५:३९

काठमाडौं । अख्तियार दुरुपयोग अनुसन्धान आयोगले वीपी कोइराला स्वास्थ्य विज्ञान प्रतिष्ठान, धरानमा कार्यरत कम्प्युटर इन्जिनियर राकेश कुमार दासविरुद्ध विशेष अदालतमा भ्रष्टाचार मुद्दा दायर गरेको छ। नक्कली शैक्षिक प्रमाणपत्र पेस गरी सरकारी ओहोदा र लाभ लिएको पुष्टि भएपछि आयोगले उनीविरुद्ध आरोपपत्र दायर गरेको हो।

दासले प्रतिष्ठानमा कम्प्युटर इन्जिनियर पदमा नियुक्ति लिने क्रममा भारतको बिहार स्कुल परीक्षा बोर्ड, पटनाबाट इन्टरमिडिएट तह र श्री वेंकटेश्वर विश्वविद्यालय, तिरुपतिबाट ब्याचलर अफ इन्जिनियरिङको झुटो तथा नक्कली शैक्षिक प्रमाणपत्र पेस गरेको अख्तियारको दाबी छ। उनले ती नक्कली प्रमाणपत्रका आधारमा इन्जिनियर पदमा नियुक्त भई सरकारी ओहोदा, तलब, भत्ता र अन्य सेवा-सुविधा प्राप्त गरेको आयोगको अनुसन्धानबाट खुलेको प्रवक्ता सुरेश न्यौपानेद्वारा जारी विज्ञप्तिमा उल्लेख छ।

आयोगले दासको उक्त कार्य भ्रष्टाचार निवारण ऐन, २०५९ को दफा १६ को उपदफा (१) बमोजिमको कसुर भएको ठहर गरेको छ। सोही ऐनको व्यवस्थाअनुसार उनलाई कैद र जरिवानाको सजाय हुनुपर्ने मागदाबी गरिएको प्रवक्ता न्यौपानेले बताए।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.