काभा च्याम्पियन्स लिग भलिबल नेपालमा हुने

काठमाडौं । काभा च्याम्पियन्स लिग (महिला) भलिबल प्रतियोगिता नेपालमा हुने भएको छ। आगामी कात्तिक १५ देखि २१ गतेसम्म (नोभेम्बर १-७) नेपालमै आयोजना हुने भएको हो। नेपाल भलिबल संघको १४औँ पूर्ण बैठकले उक्त निर्णय गरेको संघका अध्यक्ष जितेन्द्रबहादुर चन्दले जानकारी दिए।

बैठकले काभा च्याम्पियन्स लिग आयोजनासहित अन्य विभिन्न निर्णयहरू गरेको छ। संघको आर्थिक वर्ष २०८३/८४ को वार्षिक कार्यक्रम पारित गर्दै सार्वजनिक गर्ने निर्णय गरेको छ भने महासचिव र कोषाध्यक्षको प्रतिवेदनमाथि छलफल गरी अनुमोदनसमेत गरेको छ।

त्यस्तै नेपाल भलिबल संघ स्थापनाको ५०औँ वर्ष पुगेको अवसरमा यस वर्षलाई विशेष उत्साहका साथ ‘गोल्डेन जुबली’ का रूपमा मनाउने निर्णय भएको अध्यक्ष चन्दले बताए। भलिबल संघको आगामी १३औँ चुनावी साधारण सभालाई लक्षित गर्दै असोज १५ गतेभित्र सबै जिल्ला र प्रदेशहरूको पुनर्गठन गरिसक्ने निर्णय भएको छ। यस प्रक्रियालाई व्यवस्थित र प्रभावकारी बनाउन सातवटै प्रदेशमा केन्द्रीय प्रतिनिधि चयन गरिएको छ।