२०८३ श्रावण १८, सोमबार १४:२५
चितवन । नारायणगढ-मुग्लिन सडक खण्डको विभिन्न स्थानमा खसेको पहिरो पन्छाएर सडक दुवैतर्फी रूपमा सञ्चालनमा ल्याइएको छ। सोमबार बिहान लेदोसहितको पहिरो खस्दा सो सडक खण्ड अवरुद्ध बनेको थियो।
डिभिजन सडक कार्यालय चितवनका इन्जिनियर अर्जुन घिमिरेका अनुसार तुइन खोला, नाम्सी खोला, सिमलताल, १५ किलो र १७ किलोमा लेदोसहितको पहिरो खसेको थियो। तुइन खोला, नाम्सी र सिमलतालमा पहिराका कारण एकतर्फी मात्र गाडी चलेका थिए भने अन्य ठाउँमा लेदो खसेर सडक किनारमा थुप्रिएको थियो।
ती स्थानको पहिरो पन्छाएपछि बिहान १० बजेदेखि सडक पूर्ण रूपमा सञ्चालनमा आएको हो। तुइन खोलाको पहिरो निर्माण कार्य गरिरहेको कम्पनी आफैँले हटाएको थियो भने अन्य ठाउँको पहिरो मुग्लिन र सेतीदोभानमा रहेका उपकरण प्रयोग गरी पन्छाइएको थियो।
सो सडक खण्डमा अझै पनि सिमसिम पानी परिरहेकाले जुनसुकै बेला पुनः पहिरो खस्न सक्ने जोखिम छ। त्यसैले यात्रा गर्दा विशेष सावधानी अपनाउन सवारी चालक तथा यात्रुलाई आग्रह गरिएको छ।
इमेल: [email protected]
ठेगाना: विराटनगर–२
मोबाइल नं. : ९८१९३३६४१६, ९८५२०५१७६५, ९८०७०१४०८१
कम्पनी रजिष्ट्रार दर्ता नं. : ३५०५५२–८१/८२
सूचना विभाग दर्ता नं. : ४६८३–२०८१/२०८२
सम्पादक : किशोर बुढाथोकी