नेपालले एएफसी यु–२० एसियन कप छनोट पनि गुमायो

Share this
774shares
मुलुकी खबर
मुलुकी खबर
clock२०८३ साउन २२, शुक्रबार ०९:०७
नेपालले एएफसी यु–२० एसियन कप छनोट पनि गुमायो

काठमाडौं । अन्तर्राष्ट्रिय फुटबल महासंघ (फिफा) ले अखिल नेपाल फुटबल संघ (एन्फा) माथि लगाएको निलम्बनको असर नेपाली फुटबलमा झन् भयावह बन्दै गएको छ । सोही निलम्बनका कारण नेपालले अब एएफसी यु–२० एसियन कप छनोट प्रतियोगिता पनि गुमाउने निश्चित भएको छ ।

एसियाली फुटबल महासंघ (एएफसी) ले सार्वजनिक गरेको अद्यावधिक प्रतियोगिता तालिकाबाट नेपालको नाम हटाएसँगै यु–२० राष्ट्रिय टोलीको छनोट यात्रा औपचारिक रूपमा समाप्त भएको हो।

एएफसीले यसअघि नै एन्फालाई पत्राचार गर्दै अगस्ट १ तारिखभित्र फिफाको निलम्बन फुकुवा भएमा मात्र नेपालले प्रतियोगिता खेल्न पाउने सर्त राखेको थियो । तर, तोकिएको समय सीमाभित्र निलम्बन हट्न नसकेपछि एएफसीले नेपाललाई प्रतियोगिताबाट बाहिर राख्दै नयाँ तालिका सार्वजनिक गरेको हो ।

यसअघिको  ‘ड्र’ अनुसार नेपाल डेभलपमेन्ट फेजअन्तर्गत समूह  ‘आई’ मा रहेको थियो । उक्त समूहमा आयोजक मंगोलियासहित ग्वाम र नर्दन मारियाना आइल्यान्ड्स रहेका थिए । नेपालले अगस्ट ३१ मा ग्वामविरुद्ध खेल्दै प्रतियोगिताको सुरुवात गर्ने तय थियो ।

फिफाको निलम्बनका कारण नेपालले अन्तर्राष्ट्रिय प्रतियोगिता गुमाएको यो लगातार तेस्रो पटक हो । यसअघि नै नेपालले एएफसी महिला च्याम्पियन्स लिग र एएफसी यु–१७ महिला एसियन कप छनोट प्रतियोगिता गुमाइसकेको छ ।

आगामी नोभेम्बरमा बंगलादेशमा आयोजना हुने साफ च्याम्पियनसिपमा नेपालको सहभागिता अझै अनिश्चित छ । प्रतियोगिताको  ‘ड्र’ सार्वजनिक भइसके पनि त्यसमा नेपालको नाम समावेश गरिएको छैन । एएफसीले सेप्टेम्बर १ सम्मको समय सीमा तोकेको छ । यदि उक्त मितिसम्म निलम्बन हटेमा मात्र नेपाललाई समूह  ‘ए’ मा समावेश गरिने सम्भावना रहनेछ ।

एन्फामाथिको निलम्बन लम्बिँदै जाँदा नेपाली फुटबलको साख मात्र गिरेको छैन, उमेर समूहका खेलाडीहरूको वृत्ति विकास र उनीहरूले पाउने अन्तर्राष्ट्रिय प्रतिस्पर्धाको अवसरसमेत खोसिएको छ ।  यसले नेपाली फुटबलको समग्र भविष्यलाई नै संकटमा धकेल्ने चिन्ता खेल क्षेत्रका जानकारहरूले व्यक्त गरेका छन् ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.