पूर्वप्रधानमन्त्री नेपालविरुद्धको जग्गा हिनामिना मुद्दामा साक्षी बकपत्र गराउन आदेश

काठमाडौं । पूर्वप्रधानमन्त्री माधव नेपालविरुद्ध दर्ता भएको पतञ्जलि योगपीठ तथा आयुर्वेद कम्पनी नेपालको जग्गा हिनामिना मुद्दामा सरकारी साक्षीको बकपत्र गराउन विशेष अदालतले आदेश दिएको छ ।

मंगलबार विशेष अदालतका सदस्यद्वय नारायणप्रसाद पौडेल र उमेश कोइरालाको इजलासले मुद्दामा साक्षीका रूपमा राखिएका व्यक्तिहरूलाई उपस्थित गराउन आदेश दिएको हो । सरकारी साक्षीको बकपत्र सकिएपछि मुद्दाको अन्तिम सुनुवाइका लागि अङ्ग पुग्ने जनाइएको छ ।

Advertisement

यसअघि विशेष अदालतका अध्यक्ष सुदर्शनदेव भट्ट र न्यायाधीश हेमन्त रावलको इजलासले अख्तियारले उक्त उजुरी तामेलीमा राख्ने निर्णयको फाइल झिकाउन आदेश दिएको थियो । अख्तियार दुरुपयोग अनुसन्धान आयोगले गत वर्ष जेठमा पूर्वप्रधानमन्त्री नेपालविरुद्ध १८ करोड ५८ लाख ५० हजार रुपैयाँ बिगो, जरिवाना र सजायको मागदाबी गर्दै विशेष अदालतमा मुद्दा दायर गरेको थियो ।