पुष्पलाल स्मृति ब्याडमिन्टन: कबिर र सुहम अन्तिम ३२ मा

Share this
608shares
मुलुकी खबर
मुलुकी खबर
clock२०८३ साउन २६, मंगलबार २०:२५
पुष्पलाल स्मृति ब्याडमिन्टन: कबिर र सुहम अन्तिम ३२ मा

काठमाडौं । काठमाडौंमा जारी १४ औँ पुष्पलाल स्मृति राष्ट्रिय बरियता ब्याडमिन्टन प्रतियोगितामा नेपाल पुलिस क्लबका कबिर केसी र धन्यन्तरी क्लबका सुहम कार्कीले पुरुष यू–१९ तर्फको अन्तिम ३२ मा स्थान बनाएका छन् ।

नेपाल खेलकुद महासंघ अन्तर्गतको राष्ट्रिय ब्याडमिन्टन संघको आयोजनामा भइरहेको प्रतियोगितामा कबिरले त्रिभुवन आर्मीका आशुतोष कसौधनलाई २१–११ र २१–६ को सोझो सेटमा पराजित गरे । अर्को खेलमा सुहमले फिटनेस पार्कका समीर खड्कालाई २१–१९ र २१–१२ ले पन्छाउँदै अघिल्लो चरणको यात्रा तय गरे ।

पुरुष यू–१९ एकलतर्फका अन्य प्रतिस्पर्धामा आर्मीका प्रतीक विष्टले तारकेश्वर युथ क्लबका दीप भट्टलाई, धादिङका आयुष मगरले आइबिएससीका कृष्ण तामाङलाई र आर्मीका सौर्य महर्जनले लभ ब्याडमिन्टन एकेडेमीका राम जीवन चौधरीलाई पराजित गर्दै अन्तिम ३२ मा स्थान सुरक्षित गरे ।

त्यस्तै, पुलिसका रितिक आचार्यले वाकओभर पाए भने इलामका गजेन्द्र बस्नेत र कञ्चनपुरका उदय चन्दले पनि आआफ्नो खेल जितेर अघिल्लो चरणमा प्रवेश गरे । अन्तिम ३२ मा पुग्ने अन्य खेलाडीहरूमा सुदेश राजकोटी, सोनाम ओली, सुविन श्रेष्ठ, युसुफ गुरुङ, शिशिर राणा, निश्चल अग्रहरी, सक्षम गुरुङ, प्रिन्स विक, सन्दीप राई लगायत रहेका छन् ।

ग्वार्काेस्थित योन स्पाेर्ट्स एकेडेमीको कभर्ड हलमा भइरहेको प्रतियोगिताको पुरुष यू–१५ एकलतर्फ पनि अन्तिम ३२ मा पुग्ने खेलाडीहरूको टुंगो लागेको छ । सो विधामा सुहम कार्की, प्रशान्त बुढाथोकी, उदय चन्द, निश्चल अग्रहरी, रिजन मगर, इशान गिरी, प्रज्वल बज्राचार्य, रितिक आचार्य र सुशान्त प्रजापति लगायतले खेल जित्दै अन्तिम ३२ मा स्थान बनाए ।

प्रतियोगितामा देशभरका विभिन्न क्लब र जिल्लाका उत्कृष्ट खेलाडीहरूको सहभागिता रहेको छ ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.