वैशाखयता विपद्का घटनामा २१५ जनाले गुमाए ज्यान, १५ बेपत्ता

काठमाडौं । गत वैशाख १ गतेदेखि यता देशका विभिन्न स्थानमा भएका विपद्का घटनामा परेर २१५ जनाको मृत्यु भएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार यस अवधिमा कुल ४ हजार ६ सय ८ वटा विपद्का घटना दर्ता भएका छन्।

विपद्का कारण १५ जना अझै बेपत्ता छन् भने १ हजार ४ सय २२ जना घाइते भएका छन्। प्राधिकरणका अनुसार यी घटनाहरूबाट ५ हजार ६ सय ३८ परिवार प्रभावित बनेका छन्। प्राधिकरणको तथ्याङ्कअनुसार यस अवधिमा सबैभन्दा धेरै आगलागीका घटना भएका छन्। १ हजार ९० वटा आगलागीका घटनामा परी २० जनाको मृत्यु भएको छ भने १४६ जना घाइते भएका छन्।

Advertisement

यस्तै सर्पदंशका ८९२ घटनामा ६३ जनाले ज्यान गुमाएका छन् भने ८३७ जना घाइते भएका छन्। पहिरोका ८६२ घटनामा २४ जनाको मृत्यु भएको छ भने ११ जना बेपत्ता र ३५ जना घाइते भएका छन्।

यस अवधिमा बाढीका २३७ घटना हुँदा १८ जनाको मृत्यु, ४ जना बेपत्ता र १३ जना घाइते भएका छन्। भारी वर्षाका कारण थप ४ जनाको मृत्यु भएको छ।

यसैगरी हावाहुरीका ४८० घटनामा १३ जनाको मृत्यु र ६८ जना घाइते भएका छन् भने चट्याङका २३६ घटनामा २५ जनाको मृत्यु र १३२ जना घाइते भएका छन्। जंगली जनावरको आक्रमणका २५७ घटनामा १८ जनाको मृत्यु र १३६ जना घाइते भएको प्राधिकरणले जनाएको छ।