बालिका हत्या : न्याय माग्दै प्रदर्शन जारी, राजमार्ग बन्द

बारा । तीन वर्षीया बालिका गरिमा चौधरीको हत्या विरोधमा स्थानीयवासीले बाराको पथलैया चोकमा प्रदर्शन जारी राखेका छन्। स्थानीयले गत बुधबारदेखि नै प्रदर्शन गर्दै आएका हुन्। प्रदर्शनका कारण पूर्व–पश्चिम महेन्द्र राजमार्ग अवरुद्ध भएको छ। प्रहरीले सडक खुलाउने प्रयास गरिरहेको छ भने सो क्रममा स्थानीयवासी र प्रहरीबीच वादविवादसमेत भएको छ।

इलाका प्रहरी कार्यालय सिमराका डीएसपी दयाकृष्ण भट्टले पथलैयामा सडक अवरुद्ध नगरी सिमरामा केन्द्रित भएर आन्दोलन गर्न स्थानीयवासीलाई आग्रह गरेका छन्। गरिमाको न्यायको माग गर्दै स्थानीयवासीले वीरगञ्ज–पथलैया सडकअन्तर्गत सिमरामा सडकमा टेन्ट टाँगेर समेत प्रदर्शन गरिरहेका छन्। बालिकाको परिवारलाई समर्थन जनाउन जीतपुरसिमरा उपमहानगरपालिकासहित बाराका विभिन्न क्षेत्रबाट स्थानीय सडकमा भेला भएका छन्।

Advertisement

यसअघि बिहीबार राति स्थानीय प्रशासनले केही राजनीतिक दलका प्रतिनिधि तथा जीतपुरसिमरा उपमहानगरपालिकाका जनप्रतिनिधिको रोहबरमा पाँचबुँदे सहमति गरेको थियो। तर मृतक बालिकाको परिवारले उक्त सहमति आफूहरूको सहमतिबिना गरिएको भन्दै अमान्य रहेको जनाएको छ।

सुरुमा इलाका प्रहरी कार्यालय सिमराका प्रहरी प्रमुखको लापरबाहीका कारण घटना भएको भन्दै स्थानीयले उनको सरुवाको माग गरेका थिए। प्रहरी प्रमुख डीएसपी दिलीप क्षेत्रीको सरुवा भएपछि प्रशासन र स्थानीयबीच पाँचबुँदे सहमति भएको थियो। तर मध्यरातमा भएको उक्त सहमतिमा आफूहरूको सहमति नरहेको भन्दै बालिकाको परिवारले आन्दोलन जारी राखेको हो। मृतक बालिकाको शव हाल कलैया अस्पतालमै रहेको छ। परिवारले न्यायको माग गर्दै आन्दोलनलाई निरन्तरता दिएको छ।