सरकारले सफ्टवेयर विकास तथा सञ्चालन केन्द्र स्थापना गर्ने

Share this
724shares
मुलुकी खबर
मुलुकी खबर
clock२०८३ भदौ ८, सोमबार २१:३९

काठमाडौं । सरकारले सार्वजनिक निकायमा प्रयोग हुने सफ्टवेयरको विकास, स्तरोन्नति तथा मर्मतसम्भारका लागि सफ्टवेयर विकास तथा सञ्चालन केन्द्र स्थापना गर्ने भएको छ।

प्रधानमन्त्री तथा मन्त्रिपरिषद्को कार्यालयको प्रस्तावमा भदौ ३ गते बसेको मन्त्रिपरिषद् बैठकले स्वीकृत गरेको ‘सफ्टवेयर विकास तथा सञ्चालन समिति (गठन) आदेश, २०८३’ अनुसार केन्द्र स्थापना गर्न लागिएको हो।

सार्वजनिक निकायमा प्रयोग हुने सफ्टवेयरको व्यवस्थित विकास तथा सञ्चालनमार्फत सार्वजनिक सेवा प्रवाहलाई थप सूचना प्रविधिमैत्री बनाउने उद्देश्यले केन्द्र स्थापना गर्न लागिएको सरकारले जनाएको छ।

केन्द्रको नीति तथा कार्यक्रम निर्धारण, आवश्यक मार्गदर्शन र समन्वय गर्नुका साथै सफ्टवेयर विकास, स्तरोन्नति तथा मर्मतसम्भारसम्बन्धी कामको सुपरीवेक्षण गर्ने जिम्मेवारी समितिलाई दिइएको छ।

केन्द्र सञ्चालनका लागि प्रधानमन्त्री तथा मन्त्रिपरिषद्को कार्यालयमा शासकीय मामिला हेर्ने सचिवको अध्यक्षतामा ६ सदस्यीय समिति गठन गरिएको छ। समितिले केन्द्रको कामलाई आवश्यक नीतिगत दिशा तथा समन्वय प्रदान गर्नेछ।

त्यस्तै, केन्द्रको प्रशासकीय प्रमुखका रूपमा एक जना कार्यकारी निर्देशक रहने व्यवस्था गरिएको छ। केन्द्रमा विभिन्न सेवाका राजपत्रांकित प्रथम श्रेणीका कर्मचारीसहित कुल ३० जना कर्मचारी रहनेछन्।

सरकारले केन्द्रमार्फत सार्वजनिक निकायका लागि आवश्यक सफ्टवेयरको विकास, विद्यमान प्रणालीको स्तरोन्नति तथा नियमित मर्मतसम्भारलाई व्यवस्थित गर्ने तयारी गरेको हो।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.