स्याफ्रुबेसीदेखि टिमुरेसम्म सम्पर्कविहीन, उद्धारको पर्खाइमा सयौं नागरिक

काठमाडौं । तिब्बततर्फबाट आएको भीषण बाढीका कारण रसुवाको उत्तरी क्षेत्रमा ठूलो क्षति भएको छ । भोटेकोशी नदीमा आएको बाढीले तटीय क्षेत्रका बस्ती तथा संरचनामा क्षति पुर्‍याएपछि स्याफ्रुबेसीदेखि टिमुरेसम्मको अवस्था अझै यकिन हुन सकेको छैन ।

उक्त क्षेत्र हालसम्म सम्पर्कविहीन अवस्थामा छ । गोसाइकुण्ड गाउँपालिका–६ धुन्चेका वडाध्यक्ष दावा सिदार वाइबाका अनुसार स्याफ्रुबेसी बजारदेखि टिमुरेसम्म रहेका नागरिक तथा स्थानीयसँग सम्पर्क हुन सकेको छैन । बाढीका कारण टेलिफोन टावरमा क्षति पुगेको हो वा अन्य कारणले सम्पर्क विच्छेद भएको हो भन्ने स्पष्ट नभएको उनले बताए ।

Advertisement

‘हामी धुन्चेमा छौँ । तल कति क्षति भयो भन्ने केही जानकारी छैन । स्याफ्रुबेसी बजारदेखि टिमुरेसम्म कसैसँग पनि सम्पर्क हुन सकेको छैन । हामी आफैँ पनि त्यहाँ जान सक्ने अवस्था छैन,’ वडाध्यक्ष वाइबाले भने । उनका अनुसार नेपाली सेनाको हेलिकोप्टर उद्धार तथा अवस्थाको जानकारी लिन प्रभावित क्षेत्रतर्फ गएको छ । हेलिकोप्टर फर्किएपछि मात्रै बाढीबाट पुगेको क्षतिको प्रारम्भिक विवरण प्राप्त हुने अपेक्षा गरिएको छ ।

स्याफ्रुबेसी बजारसम्मै बाढी पुगेको स्थानीयबाट खबर आएको छ । प्रभावित क्षेत्रमा रहेका नागरिकको अवस्था र क्षतिको वास्तविक विवरण उद्धार टोली पुगेपछि मात्रै स्पष्ट हुने स्थानीय जनप्रतिनिधिको भनाइ छ ।

गोसाइकुण्ड गाउँपालिका–२ का वडासदस्य पेमा दोर्जे घलेका अनुसार टिमुरे बजारमा ठूलो क्षति पुगेको छ । सयभन्दा बढी घरपरिवार प्रभावित भएको र धेरै नागरिक सुरक्षित स्थानका रूपमा डाँडातिर बसेर उद्धारको प्रतीक्षा गरिरहेको उनले बताए ।

उनका अनुसार टिमुरे क्षेत्रमा मात्रै ठूलो संख्यामा नागरिक उद्धारको पर्खाइमा छन् । बाढीपछि केही मानिस रूख तथा अग्ला स्थानमा बसेर ज्यान जोगाइरहेको जानकारी स्थानीय तह र विपद् व्यवस्थापन निकायसम्म पुगेको छ ।

बाढीबाट प्रभावित बनेका सयौं नागरिक उद्धारको पर्खाइमा छन् । स्याफ्रुबेसी र टिमुरेबाट करिब एक हजार जनाले उद्धारका लागि राष्ट्रिय विपद् जोखिम न्यूनीकरण तथा व्यवस्थापन प्राधिकरणमा सम्पर्क गरेको अधिकारीहरूले बताएका छन् । उनीहरूले आफूहरू जोखिमपूर्ण अवस्थामा रहेको भन्दै तत्काल उद्धारको माग गरेका छन् ।

टिमुरे र स्याफ्रुबेसी क्षेत्रमा बैंकका कर्मचारीसमेत सम्पर्कविहीन भएको जानकारी प्राप्त भएको छ । प्रभु बैंकका ती दुई शाखामा कार्यरत १० जनामध्ये तीन जना तथा नबिल बैंकका एक कर्मचारी सम्पर्कविहीन रहेको भन्दै खोजी तथा उद्धारका लागि आग्रह गरिएको छ ।

बाढीको कारणका बारेमा प्रारम्भिक रूपमा हिमपहिरोका कारण नदी थुनिएर अचानक पानीको बहाव बढेको हुनसक्ने अनुमान गरिएको छ । विपद् जोखिम न्यूनीकरण तथा व्यवस्थापन प्राधिकरणका अधिकारीका अनुसार बिहान करिब ८ः४० बजे बाढी नेपालतर्फ प्रवेश गरेको र त्यसपछि प्रभावित क्षेत्रबाट उद्धारका लागि लगातार सम्पर्क आउन थालेको थियो ।

प्रभावित क्षेत्रमा सञ्चार सम्पर्कसमेत प्रभावित भएकाले क्षतिको यकिन विवरण संकलनमा कठिनाइ भइरहेको छ । उद्धारका लागि नेपाली सेनासहितका सुरक्षा निकाय परिचालन भएका छन् भने हेलिकोप्टरमार्फत प्रभावित क्षेत्रको अवस्थाका बारेमा जानकारी लिने र उद्धार गर्ने प्रयास भइरहेको छ ।

रसुवाको उत्तरी क्षेत्र लगायत विभिन्न जिल्लामा बाढीले पुर्‍याएको क्षतिको पूर्ण विवरण उद्धार टोली प्रभावित क्षेत्रमा पुगेपछि मात्रै प्राप्त हुने देखिएको छ । अहिले स्थानीयको मुख्य माग भनेको सम्पर्कविहीन नागरिकको अवस्था पत्ता लगाउँदै जोखिममा रहेका व्यक्तिको तत्काल उद्धार गर्नु रहेको छ ।