रसुवामा फेरि गुड्न थाले साना सवारी

रसुवा । बाढीपहिरोका कारण सडक सञ्जालबाट अलग भएको रसुवा सदरमुकाम धुन्चे फेरि सडकमार्गबाट जोडिएको छ । वैकल्पिक सडक सञ्चालनमा आएसँगै धुन्चेसम्म चार चक्के साना सवारीसाधन आवतजावत गर्न सक्ने भएका छन् ।

भौतिक पूर्वाधार मन्त्रालयका अनुसार काठमाडौं–टोखा–छहरे–गड्खार पुल–आप्र–नर्जा–लच्याङ–सरमथली–पाटीखर्क हुँदै बोगटीटार–कालिकास्थान–धुन्चे सडकखण्ड साना सवारीसाधन सञ्चालन हुने गरी खुलाइएको हो । यसअघि बाढीका कारण रसुवातर्फ जाने मुख्य सडकका विभिन्न पुल बगाउँदा जिल्लाको सडक सम्पर्क टुटेको थियो ।

Advertisement

मितेरी पुलदेखि रसुवाभित्र मात्रै १३ वटा पुल पूर्ण रूपमा बगेका थिए । त्यस्तै, नुवाकोट–रसुवा सीमामा रहेका दुईवटा पुलसमेत बाढीले बगाएको थियो । सडक सञ्चालनमा आएपछि रसुवाको सदरमुकामसम्म आवतजावत सहज हुनुका साथै स्थानीयको दैनिक जनजीवन सामान्य बनाउन सहयोग पुग्ने बताइएको छ ।

सडक खुलेसँगै बाढी प्रभावित क्षेत्रमा राहत तथा उद्धार सामग्री पुर्‍याउन पनि सहज हुने मन्त्रालयले जनाएको छ । हाल वैकल्पिक सडकमा चार चक्के साना सवारीसाधन मात्र सञ्चालन गर्न मिल्ने अवस्था रहेको छ ।