भोटेकोशी बाढीपछि ज्यान गुमाउनेको संख्या साढे पाँच सय नाघ्यो

काठमाडौं । रसुवाको भोटेकोशी नदीमा आएको बाढीपछि ज्यान गुमाउनेको संख्या साढे पाँच सय नाघेको छ । पछिल्लो विवरण अनुसार विभिन्न जिल्लामा फेला परेका शवको संख्या ५ सय ५३ पुगेको छ । बाढीमा परेर २७ जना प्रहरी अझै सम्पर्कविहीन छन् ।

नेपाल प्रहरीले शुक्रबार साँझ सार्वजनिक गरेको विवरणअनुसार विभिन्न जिल्लामा गरी हालसम्म ५ सय ५३ वटा शव फेला परेका छन् । फेला परेका शवमध्ये रसुवामा १३, नुवाकोटमा ३८, चितवनमा २२२, तनहुँमा ३१, धादिङमा ४०, गोरखामा ४७, नवलपरासी पूर्वमा १३४ र पश्चिम क्षेत्रमा २८ वटा रहेका छन् ।

Advertisement

बाढीपछि उद्धार तथा सुरक्षा व्यवस्थापनका लागि ४ हजार ४८९ जना प्रहरी परिचालन गरिएको छ । बाढीबाट प्रभावित क्षेत्रमा घाइते तथा उद्धार गरिएका व्यक्तिको संख्या १ हजार ४७३ पुगेको छ । जसमध्ये रसुवामा ५७२, नुवाकोटमा ८९८ र धादिङमा ३ जना रहेका छन् ।

यसैगरी, काठमाडौं उपत्यकाका विभिन्न अस्पतालमा उपचाररत तथा उपचारपछि डिस्चार्ज भएका घाइतेको संख्या ९७ जना रहेको प्रहरीले जनाएको छ । बाढीपछि बेपत्ता तथा प्रभावित व्यक्तिको खोजी, उद्धार र राहत कार्यलाई प्रहरीले निरन्तरता दिइरहेको छ । सम्पर्कविहीन प्रहरी कर्मचारीको खोजी तथा उद्धार कार्यसमेत जारी रहेको नेपाल प्रहरीका केन्द्रीय प्रवक्ता डीआईजी अविनारायण काफ्लेले बताए ।