बाढीपीडित नेपालीलाई अमेरिकाको थप राहत, १० हजार परिवारले तीन महिनासम्म खाद्यान्न पाउने

काठमाडौं । अमेरिकाले नेपालका बाढीपीडितका लागि ३६ लाख अमेरिकी डलरभन्दा बढीको अतिरिक्त मानवीय सहायता उपलब्ध गराउने घोषणा गरेको छ ।

अमेरिकी विदेश मन्त्रालयले शनिबार विज्ञप्ति जारी गर्दै बाढीबाट प्रभावित नेपाली नागरिकलाई सहयोग गर्न थप राहत रकम उपलब्ध गराउने जनाएको हो । मन्त्रालयले नेपालमा परेको विपद्को कठिन अवस्थामा नेपाली जनतालाई सहयोग गर्न अमेरिका प्रतिबद्ध रहेको जनाएको छ ।

Advertisement

अमेरिकी सरकारका अनुसार अतिरिक्त सहयोगबाट बाढी प्रभावित १० हजार जनालाई आवश्यक खाद्य सामग्री उपलब्ध गराइनेछ । उक्त खाद्य सामग्री तीन महिनासम्म पुग्ने गरी व्यवस्था गरिने जनाइएको छ ।

बाढीका कारण प्रभावित नागरिकको तत्कालीन खाद्य आवश्यकता पूरा गर्न अमेरिकी सहयोग केन्द्रित हुने बताइएको छ । राहत सामग्री वितरण तथा प्रभावित समुदायसम्म सहयोग पुर्‍याउने काम सम्बन्धित मानवीय सहायता संयन्त्रमार्फत गरिनेछ ।

नेपालमा पछिल्लो समय बाढी तथा अन्य प्राकृतिक विपद्का कारण विभिन्न क्षेत्रमा जनधनको क्षति हुँदै आएको छ । यस्तो अवस्थामा प्रभावित नागरिकलाई तत्काल राहत र खाद्यान्न उपलब्ध गराउन अन्तर्राष्ट्रिय सहयोगसमेत जुटिरहेको छ ।

अमेरिकी विदेश मन्त्रालयले घोषणा गरेको अतिरिक्त सहायता बाढीपीडितको तत्कालीन मानवीय आवश्यकता सम्बोधन गर्न महत्वपूर्ण हुने अपेक्षा गरिएको छ ।