चीनद्वारा नेपाललाई ५० टन राहत सामग्री

काठमाडौं । चीन सरकारले नेपालका बाढी प्रभावितका लागि ५० टन आपत्कालीन राहत सामग्री उपलब्ध गराएको छ । सामग्री लिएर चिनियाँ जनमुक्ति सेनाको वायुसेनाका दुई वटा वाई–२० ठूला ढुवानी विमान आइतबार बिहान करिब ७ बजे त्रिभुवन अन्तर्राष्ट्रिय विमानस्थलमा अवतरण गरेका हुन् ।

काठमाडौंस्थित चिनियाँ दूतावासका अनुसार राहत सामग्रीसँगै चार जना चिनियाँ सुरुङ उद्धार विशेषज्ञ आवश्यक उपकरणसहित नेपाल आएका छन् । उनीहरूले बाढीका कारण सुरुङमा फसेकाको उद्धारमा सहयोग गर्नेछन् ।

Advertisement

त्रिभुवन अन्तर्राष्ट्रिय विमानस्थलमा आयोजित कार्यक्रममा विज्ञान, प्रविधि तथा नवप्रवर्तनमन्त्री महावीर पुन, नेपालका लागि चिनियाँ राजदूत चाङ माओमिङ र प्रतिनिधिसभा सदस्य धर्म केसीको उपस्थितिमा राहत सामग्री हस्तान्तरण गरिएको थियो । सो अवसरमा चिनियाँ उद्धार विशेषज्ञलाई स्वागतसमेत गरिएको दूतावासले जनाएको छ ।