विराटनगरबाट ‘सेतो धरती’ टिमद्वारा बाढीपीडितका लागि १ लाख १ हजार

विराटनगर । विराटनगरमा मञ्चन भइरहेको ‘सेतो धरती’नाटकको टिमले भोटेकोशी बाढीबाट प्रभावित नागरिकको राहत तथा उद्धारका लागि १ लाख १ हजार रुपैयाँ सहयोग गरेको छ ।

कान्तिपुर थिएटर र ‘सेतो धरती’ नाटक समूहका तर्फबाट लेखक अमर न्यौपानेसहितको टोलीले कोशी प्रदेशका मुख्यमन्त्री हिक्मतकुमार कार्कीमार्फत प्रधानमन्त्री दैवी प्रकोप उद्धार कोषमा उक्त रकम बराबरको चेक हस्तान्तरण गरेको हो ।

Advertisement

देश विपद्को अवस्थामा रहेका बेला नाटक मञ्चन गर्नुपरे पनि आफूहरूले सिर्जनाका माध्यमबाट शोकमा रहेका परिवार तथा प्रभावित नागरिकलाई साथ दिने उद्देश्यले सहयोग गरेको समूहले जनाएको छ ।

‘सेतो धरती’ नाटक विराटनगरमा भदौ १२, १३ र १४ गते मञ्चन भइरहेको छ । यसका लागि नाटकका कलाकार, संगीतकर्मी, सेट निर्माण तथा प्रकाश व्यवस्थापनमा संलग्न प्राविधिक, निर्देशक र आयोजक टोलीले विराटनगरमै छ ।

विपद्का कारण देश शोकमा रहे पनि नाटकको सम्पूर्ण तयारी पूरा भइसकेकाले पूर्वनिर्धारित कार्यक्रमअनुसार मञ्चन गरिएको समूहले जनाएको छ । नाटक हेर्न आउने दर्शकको सहभागितासमेत विपद्मा परेका नागरिकको सहयोगमा जोडिने भएकाले मनोरञ्जनसँगै मानवीय सहयोगको अवसरका रूपमा नाटकमा सहभागी हुन समूहले आग्रह गरेको छ ।