पूर्वाधारमा बेथिति रोक्न जनताकै साथ खोज्दै कोशी सरकार, मन्त्री जीवन आचार्यले मागे सुझाव

विराटनगर । कोशी प्रदेश सरकारले प्रदेशमा निर्माण भइरहेका तथा निर्माण सम्पन्न भएका भौतिक पूर्वाधारको अवस्था, गुणस्तर र जनउपयोगिताका बारेमा प्रत्यक्ष जानकारी लिन सर्वसाधारणसँग सुझाव मागेको छ ।

पूर्वाधार निर्माणका क्रममा देखिएका बेथिति रोक्न तथा आगामी दिनमा त्यस्ता गलत कामलाई रोक्नका लागि प्रदेश सरकारले जनताकै साथ खोजेको हो । प्रदेशको भौतिक पूर्वाधार विकासमन्त्री जीवन आचार्यले विकास निर्माणका क्षेत्रमा देखिएका समस्या पहिचान गरी आगामी योजना तथा अनुगमनलाई प्रभावकारी बनाउन जनताको प्रत्यक्ष अनुभव र सुझाव संकलन गर्न थालेका हुन् ।

Advertisement

मन्त्री आचार्यले सडक, पुल, भवनलगायत प्रदेशअन्तर्गतका पूर्वाधार निर्माणमा भइरहेको प्रगति, गुणस्तर तथा उपयोगिताका बारेमा स्थानीयलाई जानकारी उपलब्ध गराउन आग्रह गरेका छन् । निर्माणाधीन आयोजना तोकिएको गतिमा अघि बढिरहेको छ वा ढिलाइ भइरहेको छ, निर्माणको गुणस्तर कस्तो छ तथा कामप्रति स्थानीय सन्तुष्ट छन् वा छैनन् भन्ने विषयमा समेत जानकारी दिन आग्रह गरिएको छ ।

त्यस्तै, निर्माण सम्पन्न भइसकेका सडक बिग्रिएको, भत्किएको, खाल्डाखुल्डी परेको वा अन्य समस्या देखिएको भए त्यसको फोटो तथा भिडियोसहित जानकारी पठाउन भनिएको छ । सम्भव भएसम्म त्यस्ता सडक दैनिक करिब कति मानिस वा सवारीसाधनले प्रयोग गर्छन् भन्ने अनुमानित विवरणसमेत उपलब्ध गराउन प्रदेश सरकारले आग्रह गरेको छ ।

प्रदेश सरकारले लामो समयदेखि रोकिएका र पटक–पटक म्याद थपिएका वा अपेक्षित रूपमा अघि बढ्न नसकेका आयोजनाका बारेमा पनि जानकारी दिन सर्वसाधारणलाई अनुरोध गरेको छ । यसबाट आयोजनाको वास्तविक अवस्था पहिचान गरी आवश्यक अनुगमन तथा सुधारका लागि पहल गर्ने प्रदेश सरकारको तयारी छ ।

प्रदेश सरकारले स्थानीय तहमा तत्काल आवश्यक देखिएका पूर्वाधारका बारेमा पनि जनताको सुझाव मागेको छ । आफ्नो क्षेत्रको सबैभन्दा आवश्यक पूर्वाधार कुन हो, कहाँ के निर्माण गर्न आवश्यक छ, त्यसको आवश्यकता किन छ र त्यस्तो पूर्वाधार निर्माणबाट कति जनता लाभान्वित हुन सक्छन् भन्ने विवरणसमेत प्रदेश सरकारलाई पठाउन सकिने छ ।

मन्त्री आचार्यले प्रदेश सरकारले अघि बढाउने योजनाको लागतसम्बन्धी सुझावसमेत मागेका छन् । सर्वसाधारणले आफ्नो विचारमा प्रदेश सरकारले कम्तीमा कति लागतसम्मका योजना प्राथमिकताका साथ अघि बढाउन उपयुक्त हुन्छ र त्यसको कारणसमेत उल्लेख गर्न सक्नेछन् ।

पूर्वाधार निर्माणमा गुणस्तरको समस्या, तोकिएको मापदण्डविपरीत काम, लापरबाही वा अन्य अनियमितता देखिएमा त्यससम्बन्धी प्रमाण, फोटो, भिडियो तथा अन्य जानकारी उपलब्ध गराउन पनि आग्रह गरिएको छ । यसरी प्राप्त सूचनालाई प्रदेश सरकारले अनुगमन तथा अध्ययनका क्रममा उपयोग गर्ने जनाएको छ ।

प्रदेश सरकारले समस्या र कमजोरी मात्रै नभएर राम्रोसँग काम भइरहेका आयोजनाका बारेमा समेत जानकारी दिन आग्रह गरेको छ । तोकिएको मापदण्डअनुसार गुणस्तरीय, प्रभावकारी र जनउपयोगी रूपमा आयोजना सम्पन्न भइरहेको भए त्यसको जानकारीसमेत उपलब्ध गराउन भनिएको छ । विकास निर्माणमा भएका राम्रा अभ्यासको पहिचान र प्रोत्साहन पनि आवश्यक रहेको मन्त्री आचार्यको भनाइ छ ।

जनताबाट प्राप्त सुझाव र सूचनालाई प्रदेश सरकारको अनुगमन, अध्ययन तथा आगामी योजना निर्माणका क्रममा उपयोग गर्ने तयारी गरिएको छ । यसका लागि सुझाव संकलन तथा अनुगमनको जिम्मेवारी मन्त्री आचार्यका प्रमुख स्वकीय सचिव ईश्वरी आचार्यलाई दिइएको छ ।

प्रदेश सरकारले सर्वसाधारणलाई आफ्नो क्षेत्रका पूर्वाधारसम्बन्धी समस्या, आवश्यकता, सुझाव तथा सकारात्मक कामका बारेमा प्रमाणसहित जानकारी उपलब्ध गराउन आग्रह गरेको छ । सुझाव तथा सूचना इमेल ठेगाना [email protected] मा पठाउन सकिनेछ । त्यसैगरी ९८५२०८९१६५ नम्बरमा समेत सम्पर्क गर्न सकिने भौतिक पूर्वाधार विकास मन्त्रालयले उल्लेख गरेको छ ।